బ్యాడ్మింటన్ కోచ్ గోపీచంద్, షట్లర్ సైనా నెహ్వాల్ వివాదంపై గుత్తా జ్వాల ఘాటుగా స్పందించింది. 1999 జాతీయ శిబిరంలో ఏం జరిగిందో తనకు తెలుసని మరిన్ని సందేహాలు రేకెత్తించింది. ప్రస్తుతం తప్పు జరిగిందని మొసలి కన్నీరు కారుస్తున్న ఇదే వ్యక్తి హైదరాబాద్‌ను వదలి ప్రకాశ్‌ పదుకొణె అకాడమీలో ఎందుకు చేరారని ప్రశ్నించింది. తన బయోగ్రఫీలోని 'బిట్టర్‌ రైవల్‌రీ' అధ్యాయంలో సైనా తన అకాడమీ వీడడం బాధాకరమని గోపీ అన్నాడు. భారత బ్యాడ్మింటన్ దిగ్గజం ప్రకాశ్‌ పదుకొణె తన గురించి ఆమెకు సానుకూలంగా చెప్పలేదని ఆరోపించాడు.
గోపీచంద్ వ్యాఖ్యలపై ప్రకాశ్‌ పదుకొణె బ్యాడ్మింటన్ అకాడమీ (పీపీబీఏ) మంగళవారం వివరణ ఇచ్చింది. హైదరాబాద్‌ను వీడాలన్న సైనా నిర్ణయం వ్యక్తిగతమని వెల్లడించింది. ఆమె నిర్ణయంలో తమ జోక్యం లేదని స్పష్టం చేసింది. ఈ వార్తను గుత్తా జ్వాల ట్వీట్‌ చేసింది. "తప్పు జరిగిందని బాధపడుతున్న ఆ వ్యక్తే ప్రకాశ్‌ సర్‌ శిక్షణ కోసం హైదరాబాద్‌ను వీడారు. ఎవరూ ఈ ప్రశ్న అడగకపోవడం ఆశ్చర్యం" అని వ్యాఖ్యను జత చేసింది.