డబ్బుల కంటే పతకాలకే తొలి ప్రాధాన్యం: సింధు

సంపాదన కంటే పతకాలు సాధించడమే తన మొదటి ప్రాధాన్యమని స్టార్​ షట్లర్​ పీవీ సింధు అంటోంది. ఆటతో పాటు షూటింగ్​ల్లో పాల్గొనడం తనకు చాలా ఇష్టమని చెప్పింది.

డబ్బు సంపాదించడం కంటే పతకాలు సాధించడానికే తన మొదటి ప్రాధాన్యమని చెప్పింది ప్రపంచ​ ఛాంపియన్ పీవీ సింధు. ఫోర్బ్స్​ జాబితాలో తన పేరు ఉండటం పట్ల ఆనందం వ్యక్తం చేసింది. ఇతర అథ్లెట్లలా కాకుండా వాణిజ్య ప్రకటనల్లో పాల్గొనడం తనకు చాలా ఇష్టమని తాజాగా ఓ ఇంటర్వ్యూలో వెల్లడించింది.

"ఫోర్బ్స్​ జాబితాలో నా పేరు చూసుకోవడం చాలా సంతోషం అనిపించింది. క్రీడా దిగ్గజాలతో కలిసి జాబితాలో స్థానం దక్కించుకోవడం నాకు ఓ విధమైన ప్రేరణగా నిలిచింది. బ్యాడ్మింటన్​తో పాటు షూటింగ్​లకు వెళ్లడమంటే నాకు చాలా ఇష్టం. ఎందుకంటే అది​ ప్రత్యేకంగా ఉంటుంది. అయితే డబ్బు కంటే పతకాలు సాధించడానికే తొలి ప్రాధాన్యమిస్తాను"

-పీవీ సింధు, భారత బ్యాడ్మింటన్​ ప్లేయర్​

ప్రపంచ​ ఛాంపియన్​ పీవీ సింధు.. అత్యధిక పారితోషికం తీసుకుంటున్న క్రీడాకారిణుల్లో ఒకరిగా నిలిచింది. గతేడాది రూ.41.23 కోట్లు ఆర్జించి ఫోర్బ్స్​ మహిళా అథ్లెట్ల జాబితాలో 13వ స్థానాన్ని సొంతం చేసుకుంది. 2018 బీడబ్ల్యూఎఫ్​ ఛాంపియన్​షిప్​ గెలవడం సహా 2019లో ఇదే టోర్నీలో ఫైనల్స్​ వరకు వెళ్లడం ఆమె సంపద గణనీయంగా పెరగడానికి కారణమైంది.

ఇదే ఇంటర్వ్యూలో పాల్గొన్న పీవీ సింధు తండ్రి రామన్న మాట్లాడుతూ.. "ఎన్ని పతకాలు సాధించినా, ఎంత డబ్బు సంపాదించిన మనం ఎక్కడి నుంచి వచ్చామన్న మూలాలను మర్చిపోకూడదు" అని తెలిపారు.