చైనా ఓపెన్: ​టైటిల్​ గెలిచిన కరోలినా మారిన్​

ఎనిమిది నెలల విరామం తర్వాత కోర్టులో అడుగుపెట్టిన షట్లర్ కరోలినా మారిన్​... మరో టైటిల్​ ఖాతాలో వేసుకుంది. ఆదివారం జరగిన ఫైనల్లో తై జు యింగ్​(చైనీస్​ తైపీ)ను ఓడించి చైనా ఓపెన్​ విజేతగా అవతరించింది.

ప్రముఖ​ షట్లర్​ కరోలినా మారిన్..​ చైనా ఓపెన్​ విజేతగా నిలిచింది. దాదాపు ఎనిమిది నెలల అనంతరం బరిలోకి దిగిన ఈ షట్లర్.. మహిళల సింగిల్స్ ​విభాగంలో టైటిల్​ గెలిచింది. ఆదివారం జరిగిన ఫైనల్​ పోరులో తై జు యింగ్​(చైనీస్​ తైపీ)పై 14-21, 21-17, 21-18 తేడాతో విజయం సాధించింది.

మోకాలి శస్త్రచికిత్స తర్వాత 8 నెలల విశ్రాంతి తీసుకున్న మారిన్... జనవరి తర్వాత మళ్లీ ఇప్పుడే రాకెట్ పట్టింది. వచ్చి రాగానే టైటిల్​ గెలిచింది​. ఇండోనేషియా మాస్టర్స్​ ఫైనల్లో సైనాతో మ్యాచ్​ సందర్భంగా గాయపడిందీ క్రీడాకారిణి. వియత్నాం ఓపెన్​లోనూ బరిలోకి దిగిన ఈ స్టార్​... సుపానిదా కేట్​థాంగ్​(థాయ్​లాండ్​) చేతిలో తొలి రౌండ్​లోనే ఓడిపోయింది.

ప్రపంచ ఛాంపియన్​షిప్​లో స్వర్ణంతో సత్తాచాటిన భారత షట్లర్ పీవీ సింధు.. చైనా ఓపెన్​లో నిరాశపరిచింది. ప్రీ క్వార్టర్స్​లో థాయ్​లాండ్​కు చెందిన చోచూవాంగ్ చేతిలో 21-12, 13-21, 19-21 తేడాతో పరాజయం చెందింది.

ప్రపంచ ఛాంపియన్​షిప్​లో కరోలినా బరిలోకి దిగలేదు. లేదంటే సింధు, కరోలినా మధ్య హోరాహోరీ పోరు ఉండేది. 2016 రియో​ ఒలింపిక్స్​లో కరోలినా​ స్వర్ణం గెలవగా... ఫైనల్లో ఓడిన సింధు రజతంతో సరిపెట్టుకుంది.