కరోనా వైరస్‌ కారణంగా టోర్నీలన్నీ వాయిదా పడడం వల్ల క్రీడాకారుల ర్యాంకింగ్స్ను స్తంభింపచేయాలని ప్రపంచ బ్యాడ్మింటన్ సమాఖ్య (బీడబ్ల్యూఎఫ్) నిర్ణయించింది. దీని ప్రకారం మార్చి 17 వరకు ఎవరు ఏ ర్యాంకులో ఉంటే ఆ ర్యాంకులోనే కొనసాగనున్నారు. తర్వాత నిర్వహించే టోర్నీల్లో పాల్గొనడానికి లేదా సీడింగ్‌ ఇవ్వడానికి ఈ ర్యాంకులు ఉపయోగపడతాయని బీడబ్ల్యూఎఫ్ తెలిపింది.
"తదుపరి నోటీసు ఇచ్చే వరకు ప్రపంచ సీనియర్, జూనియర్ ర్యాంకింగ్స్ను అలాగే నిలిపి వేయాలని నిర్ణయించాం. ఆ ఏడాది చివరగా ఆడిన ఆల్‌ ఇంగ్లాండ్‌ ఓపెన్‌ టోర్నీ తర్వాత షట్లర్లు ఏ ర్యాంకుల్లో ఉంటే వాటిని అలాగే ఉంచుతాం. వాయిదా లేదా రద్దయిన టోర్నీలు మే లేదా జూన్‌లో నిర్వహించే ఆలోచన చేస్తున్నాం. మళ్లీ ర్యాంకులను విడుదల చేయడం అనేది టోర్నీల క్యాలెండర్‌ నిర్ణయమైన తర్వాతే జరుగుతుంది. టోక్యో ఒలింపిక్స్‌ వచ్చే ఏడాది జులై 23న ఆరంభం అవుతాయని అంతర్జాతీయ ఒలింపిక్స్‌ కమిటీ వెల్లడించిన నేపథ్యంలో ఈ క్రీడల క్వాలిఫికేషన్‌ పక్రియను సమీక్షిస్తున్నాం."