ఆ ఒక్క మ్యాచ్ నా కెరీర్​ను మార్చేసింది: సింధు

2012లో చైనా ఓపెన్​ క్వార్టర్ ఫైనల్​ తన కెరీర్​నే మార్చేసినట్లు తెలిపింది బ్యాడ్మింటన్ ప్రపంచ ఛాంపియన్​ పీవీ సింధు. ఆ మ్యాచ్​లో అప్పటి ఒలింపిక్​ ఛాపియన్​ లి జురుయ్​ను సింధు ఓడించింది. ఇటీవలే ఓ మీడియాకు ఇచ్చిన ఇంటర్వ్యూలో పలు ఆసక్తికర విషయాలు పంచుకుంది సింధు.

అంతర్జాతీయ వేదికపై ప్రారంభంలో వైఫల్యాలు తనను ఎంతగానో నిరాశపరిచాయని చెప్పింది బ్యాడ్మింటన్​ ప్రపంచ ఛాంపియన్ పీవీ సింధు. అయితే 2012లో చైనా ఓపెన్​లో అప్పటి ఒలింపిక్​ ఛాంపియన్​ లి జురుయ్​ను ఓడించడం ​వల్ల.. సీనియర్​ సర్క్యూట్​లో విజయం సాధించాలనే తన సంకల్పానికి బలం చేకూరిందని తెలిపింది.

"నేను ఆటను ప్రారంభించేటప్పుడు బాగానే ఉన్నా. కానీ, అంతర్జాతీయ ప్రమాణాలు ఒకేలా లేవు. మొదట్లో నేను తొలి రౌండ్​, క్వాలిఫయింగ్ రౌండ్లలో ఓడిపోతూ వచ్చా. ఎలాగైనా ఈ సమస్య నుంచి బయటపడాలని నిర్ణయించుకున్నా. అప్పటి నుంచి కష్టపడి పని చేస్తూనే ఉన్నా. అంతే కాదు నేను కూడా ఇతరుల్లాగే కష్టపడుతున్నా కానీ, ఎందుకు గెలవలేకపోతున్నా అని బాధపడేదాన్ని. ఎక్కడ తప్పు చేస్తున్నానో ఆలోచించా. అలా 2012లో లి జురుయ్​ను ఓడించా. ఆ సమయంలో ఆమె ఒలింపిక్​ ఛాంపియన్​. ఆ తర్వాత నుంచి ఇంకా బాగా కష్టపడ్డా. దశలవారిగా ఆటపై మరింత పట్టు సంపాదిస్తూ వచ్చా."

-పీవీ సింధు, బ్యాడ్మింటన్​ క్రీడాకారిణి

చైనా మాస్టర్స్​ క్వార్టర్​ ఫైనల్స్​లో సింధు 16 ఏళ్ల వయసులో లండన్​ ఒలింపిక్స్​ స్వర్ణ పతక విజేత జురుయ్​ను ఓడించి అందరి దృష్టిని ఆకర్షించింది. ఆ తర్వాత ప్రతిష్టాత్మక ప్రపంచ ఛాంపియన్​షిప్​లో తొలి కాంస్య పతకాన్ని సాధించింది.

ప్రస్తుతం లాక్​డౌన్​ సమయంలో కుటుంబంతో కలిసి గడుపుతున్నట్లు సింధు తెలిపింది. ఖాళీ సమయంలో పెయింటిగ్​, వంట చేయడం లాంటి వాటిపై దృష్టి పెడుతున్నట్లు పేర్కొంది.

జులై 1 నుంచి హైదరాబాద్​లో క్రీడాకారులకు శిక్షణ శిబిరాన్ని ఏర్పాటు చేయాలని బ్యాడ్మింటన్​ అసోసియేషన్​ ఆఫ్​ ఇండియా భావించింది. అయితే, రాష్ట్రంలో పెరుగుతున్న కరోనా కేసుల కారణంగా తెలంగాణ ప్రభుత్వం దీనిపై ఇంకా నిర్ణయం తీసుకోలేదు.