'ప్రభుత్వం అనుమతిస్తే హైదరాబాద్​లో శిక్షణ ప్రారంభం'

తెలంగాణ రాష్ట్ర ప్రభుత్వం అనుమతిస్తే జులై 1 నుంచి బ్యాడ్మింటన్​ శిక్షణా శిబిరాలను తిరిగి ప్రారంభిస్తామని భారత బ్యాడ్మింటన్​ సంఘం కార్యదర్శి అజయ్​ సింఘానియా తెలిపారు. లాక్​డౌన్​ విరామం తర్వాత దేశంలో కొన్ని చోట్ల క్రీడా కార్యకలాపాలు ప్రారంభమైనా.. తెలంగాణలో కరోనా సంక్షోభం పెరుగుతున్న కారణంగా రాష్ట్ర ప్రభుత్వం అందుకు అనుమతించలేదు.

జులై 1 నుంచి బ్యాడ్మింటన్​ శిక్షణా శిబిరాన్ని హైదరాబాద్​లో తిరిగి ప్రారంభించాలని యోచిస్తోంది భారత బ్యాడ్మింటన్​ సంఘం (బీఏఐ). దీని కోసం తెలంగాణ రాష్ట్ర ప్రభుత్వం అనుమతి కోసం ఎదురుచూస్తోంది. ఇప్పటికే బెంగళూరులోని ప్రకాశ్ పదుకొణె బ్యాడ్మింటన్ అకాడమీలో శిక్షణా శిబిరాలు పునఃప్రారంభం కాగా.. హైదరాబాద్​లో కరోనా వ్యాప్తి విజృంభిస్తున్న కారణంగా ఆటగాళ్ల ట్రైనింగ్​కు రాష్ట్ర ప్రభుత్వం అనుమతించలేదు.

"కరోనా సంక్షోభం కారణంగా బ్యాడ్మింటన్​ శిక్షణా శిబిరాలకు విరామాన్ని ఇచ్చాం. తాజాగా వాటిని జులై 1 నుంచి హైదరాబాద్​లో పునఃప్రారంభించాలని నిర్ణయించాం. అయితే అందుకు ఆ రాష్ట్ర ప్రభుత్వం అనుమతి కావాల్సి ఉంది. అన్ని రాష్ట్రాల సెక్రటరీలతో ప్రస్తుత పరిస్థితుల గురించి చర్చంచిన తర్వాత దేశవాళీ టోర్నీలను నిర్వహిస్తాం. అయితే ప్రస్తుతానికి సెప్టెంబర్ వరకు ఎలాంటి టోర్నీలు జరపలేం. సెప్టెంబరులో పరిస్థితులకు అనుగుణంగా తిరిగి కార్యకలాపాలను మొదలుపెట్టాలని చూస్తున్నాం".

-అజయ్​ సింఘానియా, భారత బ్యాడ్మింటన్​ సంఘం సెక్రటరీ

దేశంలో జరిగే సీనియర్​ ర్యాంకింగ్​ టోర్నీల స్థానంలో బహుళ స్థాయి దేశవాళీ టోర్నీల ప్రణాళికలను రూపొందించింది బాయ్. దాదాపు రూ.2 కోట్ల ప్రైజ్​మనీతో ఈ టోర్నీ జరిపేందుకు సిద్ధమైంది. అందులో మూడు స్థాయిల్లో మ్యాచ్​ల జరగాల్సి ఉండగా.. కరోనా కారణంగా వాటిని నిర్వహించలేదు.

భారత్​లో జరగాల్సిన రెండు ప్రపంచస్థాయి బ్యాడ్మింటన్​ టోర్నీలను ఇప్పటికే రద్దు చేశారు. పుణెలో జరగాల్సిన ఇండియా జూనియర్​ ఇంటర్నేషనల్​ గ్రాండ్​ ప్రిక్స్​ (ఆగస్టు 4-9), హైదరాబాద్​ ఓపెన్​ సూపర్​ 100 (ఆగస్టు 11-16) టోర్నీలు కరోనా నేపథ్యంలో పూర్తిగా రద్దయ్యాయి.

ఇదీ చూడండి...'వన్డేలో సూపర్​ ఓవర్ వద్దు.. ట్రోఫీ షేరింగ్​ ముద్దు'