"నా చిన్నప్పుడు 9ఏళ్ల వయసులో అమ్మ చనిపోయింది. అమ్మ ప్రేమ ఎవరికి మాత్రం తెలియదు. రోజు షూటింగ్ నుంచి వెళ్లిపోయాక ప్రతిఒక్కరికీ వాళ్ల అమ్మ 'తిన్నావారా?' అంటూ ఫోన్ చేస్తారు. కానీ నాకు ఎవరూ ఫోన్ చేసే వారు లేరు. నన్ను అడిగేవారు లేరు. రోజూ రూమ్లో కూర్చొని బాధపడతా. ఏడుస్తా. మీరందరూ అమ్మలు ఉండి కూడా ఎవరు చూసుకోవట్లేదు. వారిని విడిచి ఎలా ఉంటున్నారు? మా అమ్మ లేకపోతే బతకలేకపోతున్నా. కష్టంగా ఉంది. మీరు మీ తల్లులను తీసుకెళ్లండి అన్నా దయచేసి దండం పెడతా. ప్లీజ్ అన్నా".. ఇదంతా చదువుతుంటే కన్నీళ్లు ఆగట్లేదు కదూ. 'శ్రీదేవి డ్రామా కంపెనీ' షోలో(Sridevi drama company latest episode).. తల్లిని కోల్పోయిన ప్రవీణ్ అనే కంటెస్టెంట్ కన్నీరు పెట్టుకుంటూ తన మనసులోని వ్యథను చెప్పుకొన్న తీరు ఇది.
'శ్రీదేవి డ్రామా కంపెనీ' ప్రోగ్రామ్ (Sridevi drama company timings).. 'తల్లిదండ్రులను వదిలేసిన పిల్లల్లో మార్పు తెచ్చేందుకు' ఇటీవల ఓ ప్రత్యేక కార్యక్రమం చేసింది. అనాథలుగా ఉన్న వృద్ధులను షోకు పిలిపించి వారికి వినోదాన్ని పంచింది. దానికి సంబంధించిన పూర్తి ఎపిసోడ్ ఇటీవల ప్రసారమై ప్రతి ప్రేక్షకుడి చేత కన్నీరు పెట్టించింది. ఆలోచింపజేసేలా ఉన్న ఈ ఎపిసోడ్ వారి మనసులను కదిలించింది. ఈ షోలోనే ప్రవీణ్.. చనిపోయిన తన అమ్మను ప్రతిరోజు గుర్తుచేసుకుంటూ ఎంతగా బాధపడ్డాడో వివరించాడు. తన మాటలతో ప్రేక్షకుల హృదయాల్ని బరువెక్కించాడు. 'తల్లిదండ్రులను వదిలేయకండి' అంటూ బతిమాలాడు. అలాంటి వారు ఉంటే కన్నవాళ్లను వెనక్కి తీసుకెళ్లాలని కోరాడు.