నటిగా, వ్యాఖ్యాతగా అటు వెండితెర, ఇటు బుల్లితెరపై మంచి గుర్తింపు తెచ్చుకున్నారు రష్మి(Rashmi Gautam news). ఇక సామాజిక మాధ్యమాల వేదికగానూ ఆమె ఎంతో చురుగ్గా ఉంటారు. వివిధ అంశాలపై స్పందిస్తూ తన అభిప్రాయాలను పంచుకుంటారు. కించపరిచేలా సోషల్‌మీడియాలో ఎవరు మాట్లాడినా అక్కడే ఉతికి ఆరేస్తారు. రష్మి కేవలం నటి మాత్రమే కాదు, జంతు ప్రేమికురాలు కూడా. 'ఆకలేస్తే నోరు ఉన్న మనుషులు అడుగుతారు. మరి మూగ జీవాలు అడగలేవు కదా' అంటూ కరోనా సమయంలో ఎన్నో వీధి కుక్కలకు ఆహారం అందించారు. తాజాగా ఓ నెటిజన్ పంచుకున్న వీడియోపై విచారం వ్యక్తం చేశారు.
మధ్యప్రదేశ్‌ దేవాస్‌లోని వీధి కుక్కలను మున్సిపల్‌ సిబ్బంది పట్టుకునే క్రమంలో ఓ కుక్కకు తాడు బిగించి అది చనిపోయే వరకూ కొట్టి చంపారు. 'ఈ వీడియోను మధ్యప్రదేశ్‌లోని దివాస్‌లో చిత్రీకరించారు. మున్సిపల్‌ కార్పొరేషన్‌కు చెందిన ఇద్దరు ఉద్యోగులు వీధి కుక్కను తాడుతో కట్టి, దాన్ని చావబాదారు. సుమారు 30 నిమిషాల పాటు అలా కొట్టి చంపారు' అని పేర్కొంటూ ఆ వ్యక్తి రష్మిని ట్యాగ్ చేశారు.