చిత్రం: సార్పట్ట, నటీనటులు: ఆర్య, దుషారా విజయన్‌, పశుపతి, అనుపమ కుమార్‌ తదితరులు; సంగీతం: సంతోష్ నారాయణ్‌; నిర్మాత: షణ్ముగమ్‌ దక్షణ్‌రాజ్‌; రచన, దర్శకత్వం: పా.రంజిత్‌; విడుదల: అమెజాన్ ప్రైమ్ వీడియో
క్రీడా నేపథ్యంలో ముఖ్యంగా బాక్సింగ్‌ ఇతివృత్తంగా అన్ని చిత్ర పరిశ్రమల్లోనూ సినిమాలు వచ్చాయి. ఇటీవల ఓటీటీ వేదికగా విడుదలైన 'తుఫాన్‌' కూడా బాక్సింగ్‌ కథతో తీసిన చిత్రమే. తమిళంతో పాటు తెలుగు ప్రేక్షకులకు సుపరిచితుడైన నటుడు ఆర్య. రజనీతో 'కబాలి', 'కాలా' తీసి మంచి క్రేజ్‌ తెచ్చుకున్న దర్శకుడు పా.రంజిత్‌. వీరిద్దరి కాంబినేషన్‌లో వచ్చిన చిత్రం 'సార్పట్ట'. పీరియాడికల్‌ స్పోర్ట్స్‌ డ్రామాగా వచ్చిన ఈ చిత్రం ఎలా ఉంది? బాక్సర్‌గా ఆర్య ఎలా చేశాడు? సామాజిక సమస్యలను ప్రస్తావిస్తూ కమర్షియల్‌ హంగులు జోడించే పా.రంజిత్‌ ఈ సినిమాను ఎలా తెరకెక్కించారు?
కథేంటంటే: ఆంగ్లేయులు తమ సరదా కోసం కొందరు భారతీయులకు బాక్సింగ్‌ నేర్పిస్తారు. అలా బాక్సింగ్‌ నేర్చుకున్న కొందరు తమ తర్వాత తరాల వారికి కూడా దాన్ని నేర్పుతారు. ఈ క్రమంలో కొందరి కుటుంబాల్లో బాక్సింగ్‌ వంశపారంపర్యంగా వస్తుంటుంది. అలా ఇడియప్ప, సార్పట్ట పరంపరలు ఈ సంప్రదాయాన్ని కొనసాగిస్తూ పోటీ పడుతుంటాయి. ఉత్తర చెన్నైలోని ఓ హార్బర్‌లో కూలీగా పనిచేస్తుంటాడు సమరన్‌(ఆర్య). చిన్నప్పటి నుంచి బాక్సింగ్‌ అంటే పిచ్చి. స్కూల్‌ ఎగ్గొట్టి మరీ పోటీలు చూడటానికి వెళ్లేవాడు. అయితే, సమరన్‌ బాక్సింగ్‌ పోటీలకు వెళ్లడం తల్లి భాగ్యం(అనుపమ కుమార్‌)కు నచ్చదు. ఒకరోజు ఇడియప్ప× సార్పట్ట పరంపరల మధ్య జరిగిన బాక్సింగ్‌ పోటీలో సార్పట్ట ఓడిపోతుంది. దీంతో సార్పట్ట తరపున బాక్సింగ్‌ చేసి గెలుస్తానని సమరన్‌ ప్రతిజ్ఞ చేస్తాడు. సమరన్‌ బాక్సర్‌ అవడం అతని తల్లికి ఎందుకు ఇష్టం లేదు? మరి సమరన్‌ ఎలా బాక్సర్‌గా మారాడు? ఈ క్రమంలో అతనికి ఎదురైన అనుభవాలు ఏంటి? ఇడియప్ప పోటీదారైన వేటపులి(జాన్‌ కొక్కెన్‌)ని ఓడించాడా? సార్పట్ట పరంపర పరువును నిలిపాడా? తెలియాలంటే సినిమా చూడాల్సిందే!
ఎలా ఉందంటే:ప్రేక్షకుడికి ఉత్సాహం పంచుతూ, ఉత్కంఠ కలిగిస్తూ అలరించే చిత్రాలకు కేరాఫ్‌ అడ్రస్‌ స్పోర్ట్స్‌ డ్రామా. ఎందుకంటే భావోద్వేగాలు అత్యున్నత స్థాయిలో ఉంటాయి. అవే సినిమా జయాపజయాలను నిర్ణయిస్తాయి. ఈ విషయంలో 'సార్పట్ట' దర్శకుడు పా.రంజిత్‌ సక్సెస్‌ అయ్యారు. గతంలో ఆయన తీసిన చిత్రాలు తెలుగు ప్రేక్షకులను పెద్దగా అలరించలేకపోయాయి. కానీ, బాక్సింగ్‌ నేపథ్యంలో వచ్చిన 'సార్పట్ట' ఆ ఖాళీని పూర్తి చేసింది. 70వ దశకం చివరిలో విధించిన ఎమర్జెన్సీ కాలానికి బాక్సింగ్‌ నేపథ్యాన్ని జోడించి సినిమాను తీర్చిదిద్దాడు దర్శకుడు. ఇతర విషయాల జోలికి వెళ్లకుండా నేరుగా కథలోకి తీసుకెళ్లిపోయాడు. బాక్సింగ్‌ అంటే ప్రాణం పెట్టే ఓ యువకుడు అనుకోకుండా బాక్సర్‌గా మారడం, ఇరు వర్గాలు చేసే కుట్రల నుంచి తప్పించుకుని పోటీలో దిగడం తదితర సన్నివేశాలతో ఆసక్తిగా తీర్చిదిద్దాడు.
మొదటి అరగంటలో వచ్చే బాక్సింగ్‌ సన్నివేశాలు చూసే ప్రేక్షకుడిలో సినిమాపై ఆసక్తిని పెంచుతాయి. దాన్ని ఏమాత్రం తగ్గకుండా ప్రథమార్ధమంతా కొనసాగించాడు దర్శకుడు. విరామానికి ముందు వచ్చే బాక్సింగ్‌ ఫైట్‌ చూస్తే సినిమా క్లైమాక్స్‌ ఫైటా? అన్న స్థాయిలో ఉంటుంది. అంతలా అలరించేలా ఆ ఫైట్‌ సీక్వెన్స్‌ తీర్చిదిద్దారు. దీంతో ద్వితీయార్ధంలో ఏం చూపించబోతున్నాడా? అన్న ఉత్కంఠ ప్రేక్షకుడిలో కలుగుతుంది. అయితే, ఎమర్జెన్సీ కారణంగా గురువు రంగయ్య(పశుపతి)జైలుకు వెళ్లడం వల్ల సమరన్‌ బాక్సింగ్‌ వదిలి చెడు వ్యసనాలకు బానిస అవుతాడు. ఈ క్రమంలో వచ్చే సన్నివేశాలు సాగదీతగా అనిపిస్తాయి. అక్కడి నుంచి కథ కాస్త రాజకీయ రంగు పులుముకుంటుంది. తన మార్కు సామాజిక సమస్యను స్పృశించే ప్రయత్నం చేశాడు దర్శకుడు. తాగుడు వల్ల వచ్చే అనర్థాలను చెప్పే ప్రయత్నం చేసినా, అవన్నీ సాగదీతగా అనిపిస్తాయి. కథ గమనం నెమ్మది అయిపోతుంది. ఈ క్రమంలో ఒకట్రెండు భావోద్వేగ సన్నివేశాలు ఉన్నా, పెద్దగా మెప్పించవు. ఎప్పుడైతే జైలు నుంచి రంగయ్య బయటకు వచ్చాడో ఆ తర్వాత కథ పూర్తిగా మారిపోతుంది. చివరి అరగంట, పతాక సన్నివేశాలు పరుగులు పెడతాయి. అవన్నీ ప్రేక్షకులను అలరిస్తాయి. ఓవరాల్‌గా ఓ మంచి స్పోర్ట్స్‌ డ్రామా చూశామన్న ఫీలింగ్‌ ప్రేక్షకుడిలో కలుగుతుంది. ఇటీవల వచ్చిన 'తుఫాన్‌'తో పోలిస్తే, 'సార్పట్ట' ఇంకాస్త బెటర్‌ అనే ఫీలింగ్‌ కలుగుతుంది.