రివ్యూ: 'డిస్కోరాజా'గా రవితేజ ఆకట్టుకున్నాడా..!

మాస్ మహారాజా రవితేజ నటించిన సినిమా 'డిస్కోరాజా'. ఈరోజు ప్రేక్షకుల ముందుకొచ్చింది. మరి ఈ హీరో హిట్ కొట్టాడా? లేదా? అనేది ఈ సమీక్ష చూసి తెలుసుకుందాం.

'రాజా ది గ్రేట్' తర్వాత వరుసగా మూడు ప్లాపులు మూటగట్టుకున్న మాస్ మహారాజా రవితేజ నటించిన తాజా చిత్రం 'డిస్కో రాజా'. వి.ఐ ఆనంద్ దర్శకుడు. నభా నటేశ్, పాయల్ రాజ్​పుత్, తాన్యా హోప్ హీరోయిన్లు. ఈరోజే ప్రేక్షకుల ముందుకొచ్చిందీ సినిమా. కేవలం టీజర్లు మాత్రమే విడుదల చేసి ప్రేక్షకులను థియేటర్లకు రప్పించిన రవితేజ... 'డిస్కోరాజా'గా అలరించాడా? హ్యాట్రిక్ ప్లాపుల నుంచి బయటపడ్డాడా? లేదా అనేది ఈటీవీ భారత్ సమీక్షలోకి వెళ్లి తెలుసుకుందాం.

ఇదీ కథ

మద్రాసులో చిన్న చిన్న దొంగతనాల చేసే స్థాయి నుంచి గ్యాంగ్​స్టర్​గా ఎదుగుతాడు డిస్కోరాజా(రవితే‌జ‌). అక్కడే ఉన్న బర్మా సేతు(బాబీ సింహా‌) డిస్కోరాజాకు పోటీకి వస్తాడు. ఇద్దరి మధ్య గ్యాంగ్ వార్స్ జరుగుతుంటాయి. అప్పుడే డిస్కోరాజాకు అనాథ అయిన హెలెన్ (పాయల్ )తో పరిచయం ఏర్పడుతుంది. ఒకరికొకరు దగ్గరవుతారు. సేతుతో గొడవల వల్ల తన కొడుకు అనాథ కాకూడదని భావించిన డిస్కోరాజా హెలన్​తో లడఖ్ వెళ్లిపోతాడు. కొన్ని రోజుల తర్వాత అక్కడా, డిస్కోరాజాపై దాడి జరుగుతుంది. అతడ్నిచంపేస్తారు. కానీ రీలైవ్ అనే బయోల్యాబ్ పరిశోధన వల్ల 35 ఏళ్ల తర్వాత డిస్కోరాజామళ్లీ బతికొస్తాడు. అయితే తనకు పాత జ్ఞాపకాలేవీ గుర్తుండవు. వయసు పాతికేళ్లలానే కనిపిస్తుంటుంది. ల్యాబ్ నుంచి బయటపడ్డ డిస్కోరాజా తననెవరు చంపారో తెలుసుకునే ప్రయత్నంలో అతడికి ఎలాంటి నిజాలు తెలిశాయి? డిస్కోరాజాను చూసిన సేతు ఏం చేశాడు? నభా(నభా నటాషా‌)తో ఉన్న సంబంధమేంటో తెలియాలంటే సినిమా చూడాల్సిందే.

ఎలా ఉందంటే

డిస్కోరాజా... రవితేజ మాస్ ఇమేజ్​ను దృష్టిలో పెట్టుకొని అల్లిన కథ. 1980లో ఇద్దరు గ్యాంగ్ స్టర్​ల మధ్య జరిగిన సంఘటనలను సైన్స్​తో ముడిపెట్టి ప్రేక్షకులను అలరించేందుకు దర్శకుడు చేసిన కొత్త ప్రయోగం. కథ పరంగా పాత చింతకాయపచ్చడే అయినా... ఊహించని మలుపులతో కథనాన్ని ఆసక్తికరంగా మలిచి రవితేజ అభిమానులను ఫ్రీకౌట్ చేశాడు. లడఖ్​తో మొదలైన ఫస్టాప్​లో ప్రారంభ సన్నివేశాలతో భలే ఉందే అనిపించిన దర్శకుడు... ప్రకృతికి విరుద్దంగా జరిగే ప్రయోగానికి శ్రీకారం చుట్టాడు. హనుమంతుడు సంజీవని పర్వతాన్ని తీసుకొచ్చి లక్ష్మణుడ్ని బతికించినట్టుగానే.. మంచు కొండల్లో 35 ఏళ్లుగా నిర్జీవంగా పడి ఉన్న డిస్కోరాజాను బతికిస్తాడు. ఆ తర్వాత తానెవరో తెలుసుకునేందుకు బయల్దేరిన డిస్కోరాజాకు తన పేరేంటో తెలియడం, తనను ఎవరు చంపారో తెలుసుకొన్న తర్వాత ఫస్టాప్​ను ముగించాడు. సెకండాఫ్ కొచ్చేసరికి రివైండ్ బటన్ నొక్కాడు. ట్విస్ట్​ల మీద ట్విస్ట్​లిస్తూ కథనాన్ని నడిపించాడు. సేతుతో డిస్కోరాజాకున్న గొడవ, ఆ గొడవల్లో డిస్కోరాజా ఎలా చనిపోయాడో తెలుసుకునేందు ప్రేక్షకుడ్ని 1980లోకి తీసుకెళ్లాడు. కట్ చేస్తే 35 ఏళ్ల తర్వాత బతికొచ్చిన డిస్కోరాజాకు దిల్లీలో కనిపించకుండా పోయిన వాసు(రవితేజ) డిస్కోరాజా కొడుకనే విషయం తెలుస్తుంది. డిస్కోరాజాను నమ్మిన వ్యక్తులు ఎలా మోసం చేశారో చూపించడంతో కథను క్లైమాక్స్​కు చేర్చాడు.

ఎవరెలా చేశారు

రవితేజ.. గ్యాంగ్ స్టర్ డిస్కోరాజాగా, అమాయకుడైన వాసుగా రెండు లుక్స్​తో కనిపించి మెప్పించాడు. అలాగే బాబీ సింహా.. తన విలనిజంతో ఆకట్టుకున్నాడు. సేతుగా సెటిల్డ్ ఫర్మామెన్స్​తో తెరపై విలనిజాన్ని చూపించాడు. కథానాయికలు నభా, పాయల్ పాత్రలు కొన్ని మాటలు, రెండు పాటలకే పరిమితమయ్యాయి. అలాగే రవితేజ గ్యాంగ్​లో నటించిన సునీల్ ఉత్తమ్ కుమార్​గా కీలక పాత్ర పోషించాడు. ఆ పాత్ర ఏంటీ, దానికున్న ప్రాధాన్యత ఏంటనేది సినిమాలో చూడాలి. దర్శకుడిగా వీఐ ఆనంద్ తనదైన ముద్ర కనిపిస్తుంది. తమన్ అందించిన నేపథ్య సంగీతం డిస్కోరాజాకు ప్రత్యేక ఆకర్షణగా నిలిచింది. ఎస్ఆర్​టీ ఎంటర్ టైన్​మెంట్ నిర్మాణ విలువలు బాగున్నాయి.

బలం: రవితేజ, తమన్ నేపథ్య సంగీతం, క్లైమాక్స్

బలహీనత: కథ, నెమ్మదిగా సాగే కథనం

చివరగా: ఊహించని మలుపులతో మజా లేలో అంటోన్న 'డిస్కోరాజా'

గమనిక: ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే