"శ్రీమంతుడు", "భరత్ అనే నేను" విజయాల తర్వాత భారీ అంచనాల మధ్య విడుదలైన మహేశ్బాబు చిత్రం 'మహర్షి'. తన 25వ చిత్రం కావడం కంటే కథలో బలమైన సందేశముందని చెప్పుకొచ్చాడీ హీరో. దర్శక నిర్మాతలు 18 నెలలపాటు శ్రమించి ఈ సినిమాను తెరకెక్కించారు. మహేశ్ కెరీర్లో మరో మైలురాయి అవుతుందని ధీమా వ్యక్తం చేశారు.
కథేంటీ..?
'సక్సెస్ కు కామాలే తప్ప పుల్ స్టాప్ లు ఉండవు' అని విశ్వసించే రిషి కుమార్(మహేశ్ బాబు) జీవిత ప్రయాణమే ఈ సినిమా కథ. సివిల్స్ చదవాలన్న తండ్రి కోరికకు భిన్నంగా విశాఖపట్నం ఐఐఈటీలో ఇంజినీరింగ్ పూర్తి చేస్తాడు. అమెరికాలోని అర్జిన్ (ORGIN) సాప్ట్ వేర్ కంపెనీకి సీఈఓ అవుతాడు. అదే తన సక్సెస్ అని భావిస్తుంటాడు. కానీ ఇంజినీరింగ్ కళాశాలలో తన స్నేహితుడు రవి(అల్లరి నరేశ్) చేసిన త్యాగం వల్లే ఆ విజయం తనకు లభించిందని తెలుసుకుంటాడు. హుటాహుటిన అమెరికా నుంచి భారత్కు వచ్చిన రిషి... రామవరంలో ఉన్న స్నేహితుడిని కలుసుకుంటాడు. తనతోపాటు చదువుకున్న రవి.. గ్రామంలోనే ఎందుకు ఉండిపోవాల్సి వచ్చిందో తెలుసుకుంటాడు. స్నేహితుడికి ఎదురైన సమస్యను పరిష్కరించి నిజమైన గెలుపును ఎలా అందుకున్నాడనేదే 'మహర్షి' కథ.
ఎలా ఉందంటే
'మహర్షి' కథ కేవలం రిషి అనే యువకుడి ప్రయాణం మాత్రమే కాదు. ఆ ప్రయాణానికి రైతు జీవితాలను ముడిపెట్టి అల్లిన చక్కటి కథ. ప్రథమార్థం రిషి ఇంజినీరింగ్ చదువు, కళాశాలలో రవి, రిషిల స్నేహం, రిషితో పూజ(పూజా హెగ్డే) ప్రేమ వ్యవహారం, సాప్ట్ వేర్ కంపెనీకి సీఈఓగా ఎదిగిన తీరుతో నెమ్మదిగా సాగుతోంది.
ద్వితీయార్థానికి వచ్చేసరికి రిషి ప్రయాణం కొత్త మలుపు తిరుగుతుంది. రవి గ్రామమైన రామవరంలోనే మూలకథ అంతా సాగుతుంది. సీఈఓ ఉద్యోగానికి రాజీనామా చేసి రిషి రైతుగా మారడం, రామవరం రైతులతో నయా వ్యవసాయం చేయించడం, గ్యాస్ పైపులైన్ ప్రాజెక్టు కోసం వివేక్ మిట్టల్ అనే కార్పొరేట్ వ్యాపారి కుట్రను అడ్డుకోవడం... సినిమాలో ప్రధానంగా నిలుస్తాయి.
రైతులపై సానుభూతి చూపించకుండా రైతులను గౌరవించాలని రిషి చెప్పడం బాగుంది. రైతులకు, వ్యవసాయానికి మధ్య అనుబంధాన్ని పతాక సన్నివేశాల్లో మహేశ్ బాబు మాటల్లో చక్కగా విశ్లేషించారు. విందులు, వినోదాల పేరుతో వారాంతాల్లో కాలాన్ని, డబ్బును వృథా చేయడం కంటే రైతులకు అండగా ఉందామంటూ పిలుపునివ్వడం ప్రేక్షకులను ఆలోచింపజేస్తుంది. పతాక సన్నివేశాల్లో రైతులు... మహేశ్ కు మట్టిని బహుమతిగా ఇవ్వడం ప్రత్యేక ఆకర్షణగా నిలుస్తుంది.
ఎవరెలా చేశారు..?
25వ చిత్రాన్ని ప్రతిష్టాత్మకంగా తీసుకుని... మరో బలమైన సబ్జెక్ట్ ను ఎంచుకున్నాడు మహేశ్బాబు. రిషిగా మూడు కోణాల్లో తనదైన నటనతో ప్రేక్షకులను కట్టిపడేశాడు. చురుకైన విద్యార్థిగా , హుందాతనం ఉన్న సీఈఓగా, రైతుల కోసం పోరాడే యువకుడిగా నటించి అభిమానుల్లో ఉత్సాహాన్ని నింపాడు.