తెలుగు, తమిళ చిత్రాల్లో కథానాయికగా తనకంటూ ప్రత్యేక గుర్తింపు తెచ్చుకున్న నటి మెహరీన్. ఈ అందాల భామ నిశ్చితార్థం ఆమె ప్రియుడు భవ్య బిష్ణోయ్‌తో ఇటీవల రాజస్థాన్లో ఘనంగా జరిగింది. తాజాగా ఓ ఇంటర్వ్యూలో పాల్గొన్న ఈ భామ.. పెళ్లి, కాబోయే భర్త, కెరీర్ గురించి పలు విషయాలను పంచుకుంది. పెళ్లి తర్వాత కూడా నటనను కొనసాగిస్తానని స్పష్టం చేసిన ఈ ముద్దుగుమ్మ.. వ్యక్తిగత, వృత్తిపరమైన జీవితాన్ని బ్యాలెన్స్ చేసుకుంటానని ధీమా వ్యక్తం చేసింది.
తన నిర్ణయాలను గౌరవించి అర్థం చేసుకునే భాగస్వామి దొరకడం తన అదృష్టమని వెల్లడించింది మెహరీన్. ఈ ఏడాది చలికాలంలో డెస్టినేషన్ వెడ్డింగ్ చేసుకోనున్నట్లు తెలిపిన ఈమె.. తొలుత గురుద్వారాలో పంజాబీ స్టైల్లో, ఆ తర్వాత అదే రోజు హిందూ రీతిలో వివాహం చేసుకోనున్నట్లు తెలిపింది. పెళ్లి తర్వాత దిల్లీకి తన మకాంను మారుస్తానని చెప్పుకొచ్చింది.