సీనియర్‌ నటుడు కృష్ణ పుట్టిన రోజు సందర్భంగా ఆయన తనయుడు మహేశ్బాబు కొత్త సినిమా టైటిల్, ప్రీలుక్‌ను చిత్ర బృందం వెల్లడించింది. పరశురామ్‌ దర్శకత్వంలో తెరకెక్కుతోన్న ఈ చిత్రానికి 'సర్కారు వారి పాట' అనే టైటిల్‌ను ఖరారు చేశారు. మహేశ్ ప్రీలుక్‌లో చెవికి పోగు, మెడపై రూపాయి టాటూ, మాసిన గడ్డంతో రఫ్‌గా కనిపిస్తుండటం సినిమాపై ఆసక్తిని పెంచుతోంది. మహేశ్ మెడపై రూపాయి పచ్చబొట్టు వెనుక ఆసక్తికర కథ ఒకటి సామాజిక మాధ్యమాల్లోనూ, టాలీవుడ్‌లోనూ చక్కర్లు కొడుతోంది.
పరశురామ్‌ ఈ కథను తొలుత అమెరికా నేపథ్యంలో రాసుకున్నారట. అయితే, ప్రస్తుత పరిస్థితుల్లో అక్కడకు వెళ్లి షూటింగ్‌ చేసే అవకాశాలు చాలా తక్కువగా ఉండటం వల్ల ఆ నేపథ్యాన్ని ఇండియాకు మార్చారని టాక్‌. దాంతో డాలర్‌ సింబల్‌తో మెడపై టాటూ వేయాల్సి ఉండగా, దాన్ని రూపాయి టాటూగా మార్చారట. మహేశ్ చెవికి ఉన్న పోగు, రఫ్‌ లుక్ చూస్తుంటే.. ఆయన పాత్రకు 'పోకిరి' సినిమాలోని మాస్ లక్షణాలు ఉంటాయని అంటున్నారు.