ఆ విషయంలో ఎవరు చెప్పినా వినను: రాజమౌళి

దర్శకుడు రాజమౌళి నుంచి కొత్త చిత్రం వస్తుందంటే.. అభిమానుల్లో భారీ అంచనాలుంటాయి. ఆయన తీసే ప్రతి సినిమా హిట్టే. మరి అలాంటి దర్శక దిగ్గజం.. కొన్ని సీన్లు బాలేవంటూ ఎవరైనా సలహా ఇస్తే ఏం చేస్తారు?. ఆ సమయంలో ఎలా ఆలోచిస్తారు?

రాజమౌళి.. ఈ పేరు గురించి ప్రత్యేకంగా చెప్పనక్కర్లేదు. ఎందుకంటే ఆయన తెరకెక్కించే సినిమాలు.. అందులోని ప్రతి సన్నివేశం ఓ అద్భుతం. ఆయన చిత్రాల్లోని ప్రతి ఫ్రేమూ ప్రేక్షకులను ఊహాలోకంలో విహరించేలా చేస్తాయి. అయితే.. జక్కన్న సినిమా తీసే క్రమంలో ఎలా ఆలోచిస్తారు?. ఇతరుల సలహాలు తీసుకుంటారా? లేదా? అనే పలు ఆసక్తికరమైన విషయాలు ఓ ఇంటర్యూలో పంచుకున్నారు.

ససేమిరా..

"నా సినిమా విజయవంతమవ్వడానికి కారణం నా రేషనాలిటీ. కథలో ఓ సన్నివేశం లేదా పాయింట్​ గొప్పగా అనిపిస్తుంది. దాన్ని సెంట్రల్​ ఐడియా అంటాం. కథను డెవలెప్ లేదా మేకింగ్​ చేసేటప్పుడు ఓ సన్నివేశం తెరకెక్కించే విషయంలో నేను చాలా ఆత్మవిశ్వాసంతో ఉంటా. ఎవరైనా వచ్చి ఆ సన్నివేశం మార్చాలని సలహా ఇస్తే అస్సలు ఒప్పుకోను. 'ఆ సీన్​ ఎవరు చూడరు?', 'వర్కౌట్​ అవ్వదు' అని అంటుంటారు. కానీ అవి పట్టించుకోను. ఒకవేళ ఏదైనా తేడాగా ఉందని నాకు అనిపిస్తే మాత్రం తప్పకుండా ఇతరుల సూచనలు తీసుకుంటా" అని తెలిపారు జక్కన్న.

రోల్​మోడల్స్​ ఎవరైనా ఉన్నారా?

"ప్రతి మనిషిలో పాజిటివ్, నెగిటివ్ రెండూ ఉంటాయి. అందుకే నాకు రోల్​ మోడల్ అంటూ ఎవరూ లేరు" అని చెప్పారు రాజమౌళి.

జక్కన్న మగధీరకు 12 ఏళ్లు

మెగా పవర్​స్టార్​ రామ్​చరణ్​-దర్శకుడు రాజమౌళి కాంబినేషన్​లో రూపొందిన 'మగధీర'.. అప్పట్లో బాక్సాఫీసు రికార్డులను తిరగరాసింది. కెరీర్​లో రెండో సినిమాతోనే చరణ్​కు స్టార్​ హోదాను తెచ్చిపెట్టింది. ఈ చిత్రం ప్రేక్షకుల ముందుకొచ్చి నేటితో(జులై 31) 12 ఏళ్లు పూర్తయ్యింది.

ఇదీ చదవండి:'మగధీర' 100 మందిని చంపే సీన్- 15 ఏళ్ల క్రితమే..