'అశ్వథ్థామ'లో పవర్​స్టార్​.. నాగశౌర్య క్లారిటీ

పవన్‌ కల్యాణ్‌ 'పింక్‌' రీమేక్‌ కోసం అభిమానులు ఎంతలా ఎదురు చూస్తున్నారో ప్రత్యేకంగా చెప్పాల్సిన అవసరం లేదు. ఈ సినిమా గురించి ఏ చిన్న వార్త బయటకొచ్చినా వైరల్‌ అయిపోతుంది. అయితే 'అశ్వథ్థామ' చిత్రంలో పవన్​కు సంబంధించిన ఓ విశేషముందట.

పవర్​స్టార్​ పవన్​కల్యాణ్ 'పింక్' రీమేక్ షూటింగ్ హైదరాబాద్‌లో శరవేగంగా జరుగుతోంది. వేసవి కానుకగా ప్రేక్షకుల ముందుకు రానుందీ చిత్రం. అంతకంటే ముందుగానే 'అశ్వథ్థామ'తో మెగా అభిమానులందరినీ పలకరించనున్నాడట పవన్. ఆ విషయాన్ని హీరో నాగశౌర్యనే చెప్పాడు.

పవన్​తోనే ప్రారంభం

'అశ్వథ్థామ' సినిమా.. పవన్‌ కల్యాణ్‌​తోనే ప్రారంభమవుతుంది. సినిమా మొత్తాన్ని నడిపించేది ఆయనే. అలాగని సినిమాలో ఆయన కనిపించరు. కేవలం వినిపిస్తారంతే. ఈ చిత్రం ప్రారంభమయ్యేది పవర్‌స్టార్‌ వాయిస్‌తోనే అంటూ శౌర్య.. తాజాగా జరిగిన ఇంటర్వ్యూలో స్పష్టం చేశాడు. సమాజంలో మహిళలపై జరుగుతున్న అత్యాచారాల ఆధారంగా రూపొందించిన ఓ పవర్‌ఫుల్‌ యాక్షన్‌ థ్రిల్లర్‌ 'అశ్వథ్థామ'. ఇందులో హీరోకు 'అశ్వథ్థామ' పేరు పెట్టడం వెనుక 'గోపాల గోపాల'లోని ఓ డైలాగ్‌ స్ఫూర్తిగా నిలిచిందన్నాడీ కథానాయకుడు.

ఆ డైలాగ్​ ఏంటి..?

'గోపాల గోపాల'లో పవన్‌ చెప్పిన ఆ డైలాగ్‌తోనే ఈ సినిమా ప్రారంభమవుతుందని, ఆ చిత్రబృందం నుంచి ఈ విషయమై అనుమతి తీసుకున్నట్లు నాగశౌర్య చెప్పాడు. మరి ఆ డైలాగ్‌ ఏంటి? తెరపై ఎలా ఉండబోతుంది తెలియాలంటే? మరికొద్ది రోజులు ఎదురుచూడక తప్పదు.

ఇందులో మెహరీన్ హీరోయిన్​గా నటించింది. రమణతేజ దర్శకత్వం వహించాడు. నాగశౌర్య స్వయంగా 'అశ్వథ్థామ' కథ రాయడం విశేషం. ఈ శుక్రవారం థియేటర్లలోకి రానుందీ సినిమా.

ఇదీ చదవండి: 'కేజీఎఫ్-2' ముగింపు రామోజీ ఫిల్మ్​సిటీలోనే!​