'మున్నా', 'ఊపిరి', 'మహర్షి' వంటి చిత్రాలతో దర్శకుడిగా మంచి పేరు తెచ్చుకున్నారు వంశీ పైడిపల్లి. ఈయన కోలీవుడ్ ప్రముఖ నటుడు విజయ్‌తో ఓ చిత్రం చేస్తున్నారని గత కొద్ది రోజులుగా వార్తలు వస్తున్నాయి. ఈ విషయాన్ని చిత్ర బృందం అధికారికంగా ప్రకటించింది. "నా సొంత బ్యానర్‌లాంటి శ్రీ వెంకటేశ్వర క్రియేషన్స్‌ నిర్మాణంలో విజయ్ హీరోగా సినిమా చేస్తున్నానని తెలియజేస్తున్నందుకు చాలా సంతోషంగా ఉంది" అన్నారు వంశీ. కథానాయకుడిగా విజయ్‌కు ఇది 66వ సినిమా. శ్రీ వెంకటేశ్వర క్రియేషన్స్‌ సంస్థ నిర్మిస్తుంది. ప్రస్తుతం విజయ్ నటిస్తోన్న 'బీస్ట్‌' సినిమా పూర్తవగానే ఈ క్రేజీ కాంబో పట్టాలెక్కనుంది. ఈ ప్రాజెక్టుకు సంబంధించిన మరిన్ని వివరాలు త్వరలోనే తెలియనున్నాయి.
ఓటీటీలో 'ఒరేయ్ బామ్మర్ది'
సిద్దార్థ్‌ ప్రధాన పాత్రలో నటిస్తున్న యాక్షన్‌ ఎంటర్‌టైనర్‌ 'ఒరేయ్ బామ్మర్ది'. 'బిచ్చగాడు' చిత్రాన్ని తెరకెక్కించిన శశి ఈ ప్రాజెక్ట్‌ రూపొందిస్తున్నారు. జీవీ ప్రకాశ్‌ కీలకపాత్ర పోషించారు. ఇప్పుడీ చిత్రం ఓటీటీ వేదకగా ప్రేక్షకులను అలరించేందుకు సిద్ధమైంది. అక్టోబర్ 1నుంచి ఆహా వేదికగా స్ట్రీమింగ్ కానున్నట్లు తెలిపింది చిత్రబృందం. సిద్దార్థ్‌ ఇందులో ట్రాఫిక్‌ పోలీస్‌ పాత్రలో కనిపించనున్నారు. బైక్‌ రేసులంటే ఆసక్తి చూపించే ఆవేశపరుడైన యువకుడి పాత్రను జీవీ ప్రకాశ్‌ పోషించారు.