ఉపరాష్ట్రపతిని మెప్పించిన 'మహర్షి'

టాలీవుడ్​ సూపర్​స్టార్​ మహేష్ బాబు హీరోగా నటించిన 25వ చిత్రం ‘మహర్షి’. ఈ సినిమా విడుదలై మంచి కలెక్షన్లతో దూసుకెళ్తోంది. తాజాగా ఈ సినిమాను ఉపరాష్ట్రపతి వెంకయ్యనాయుడు వీక్షించారు. చిత్రబృందంపై ప్రశంసల జల్లు కురిపించారు.

రైతుల దయనీయ పరిస్థితులు, వారు ఎదుర్కొంటున్న సమస్యలను ‘మహర్షి’ చిత్రంలో చూపించారు దర్శకుడు వంశీ పైడిపల్లి. ఈ సినిమా సినీ, రాజకీయ వర్గాల నుంచి ప్రశంసలు అందుకుంది. ఉప రాష్ట్రపతి వెంకయ్య నాయుడు ‘మహర్షి’ సినిమా చూసి చిత్రబృందాన్ని అభినందించారు.

"కుటుంబ సభ్యులతో కలిసి ఈరోజు ‘మహర్షి’ చిత్రాన్ని చూశాను. గ్రామీణ ఇతివృత్తంతో, వ్యవసాయ పరిరక్షణను, అన్నదాతలకు అండగా నిలబడాల్సిన ఆవశ్యకతను తెలియజేసిన ప్రబోధాత్మక చిత్రం. ప్రతి ఒక్కరూ చూడదగిన మంచి సినిమా ''.
-- వెంకయ్య నాయుడు, ఉపరాష్ట్రపతి

హీరో మహేష్ బాబు, వంశీ పైడిపల్లి, నిర్మాతలను ప్రశంసిస్తూ ట్వీట్లు చేశారు. దీనిపై మహేశ్​బాబు స్పందిస్తూ... చిత్రబృందం తరఫున ఉపరాష్ట్రపతికి ప్రత్యేక ధన్యవాదాలు తెలిపారు.

విడుదలైన నాలుగు రోజుల్లోనే 100 కోట్లకు పైగా వసూళ్లు సాధించి బాక్సాఫీసు వద్ద విజయవంతంగా ప్రదర్శితమవుతోంది 'మహర్షి'. పూజా హెగ్డే కథానాయికగా, అల్లరి నరేష్​ కీలక పాత్రల్లో నటించారు. దిల్ రాజు, అశ్వనీదత్‌, పీవీపీలు సంయుక్తంగా నిర్మించారు.