జీవితం ఎప్పుడూ పూలబాట కాదు..! అంటారు పెద్దలు. కోలీవుడ్‌ ప్రముఖ నటుడు శరత్కుమార్ కుమార్తె వరలక్ష్మి కెరీర్‌ను చూస్తే అది నిజమే అనిపిస్తుంది. తన తండ్రి బ్యాక్‌గ్రౌండ్‌ ఉన్నప్పటికీ స్వతహాగా ఇండస్ట్రీలోకి ఎంట్రీ ఇచ్చిన ఈ భామ.. కెరీర్‌ ఆరంభంలో ఎన్నో ఇబ్బందులు ఎదుర్కొన్నారు. క్యాస్టింగ్‌ కౌచ్‌ ఇబ్బందులను చవిచూశారు. ఎదురైన ప్రతి సమస్యతో ధైర్యంగా పోరాడి.. ఇప్పుడు సక్సెస్‌ఫుల్‌ స్టార్‌ నటిగా అటు తమిళంలో ఇటు తెలుగులోనూ రాణిస్తున్నారు. శుక్రవారం 'జయమ్మ' పుట్టినరోజు సందర్భంగా తన లైఫ్‌ గురించి పలు సందర్భాల్లో ఆమె ఇలా చెప్పుకొచ్చారు!
సువర్ణావకాశం చేజారిపోయే..!
దక్షిణాదిలో పేరుపొందిన దర్శకుల్లో ఒకరైన శంకర్‌ సినిమాలో నటించే అవకాశం నన్ను వరించింది. ఆయన దర్శకత్వం వహించిన 'బాయ్స్‌' చిత్రానికి మొదట నన్నే ఎంపిక చేశారు. నటన మీద ఉన్న ఆసక్తితో ఆడిషన్స్‌కూ వెళ్లాను. సెలక్ట్‌ అయ్యాను. కాకపోతే అప్పుడు నాకు 17 సంవత్సరాలే. దాంతో సినిమాల్లోకి వెళ్తానంటే నాన్న ఒప్పుకోలేదు. అదే సమయంలో 'ప్రేమిస్తే' ఆఫర్‌ కూడా వదులుకోవాల్సి వచ్చింది.
క్యాస్టింగ్‌ కౌచ్‌ తప్పలేదు.!
నటిగా రాణించాలనే ఉద్దేశంతో సినిమాల్లోకి రాకముందు ముంబయిలోని ఓ ప్రముఖ యాక్టింగ్‌ స్కూల్‌లో శిక్షణ తీసుకున్నాను. శింబు కథానాయకుడిగా నటించిన 'పోడా పోడి'తో తెరంగేట్రం చేశాను. కొన్ని కారణాల వల్ల ఆ సినిమా విడుదల కొంత ఆలస్యమైంది. అయితే, అప్పుడే కెరీర్‌ ప్రారంభించడం వల్ల సినీ పరిశ్రమకు చెందిన కొంతమంది వ్యక్తులు నాతో అసభ్యంగా ప్రవర్తించారు. అలా, కెరీర్‌ ఆరంభంలోనే క్యాస్టింగ్‌ కౌచ్‌ ఎదుర్కొన్నాను. ఆ ఇబ్బందుల గురించి ధైర్యంగా ముందుకు వచ్చి చెప్పాను. క్యాస్టింగ్‌ కౌచ్‌ గురించి మాట్లాడడం వల్ల సినిమా ఆఫర్స్‌ కొంత తగ్గవచ్చు. కానీ తప్పకుండా మనం ఏదో ఒక సమయంలో విజయం సాధించి తీరతాం. క్యాస్టింగ్‌ కౌచ్‌ తర్వాత ఇప్పటివరకూ నేను దాదాపు 29 సినిమాల్లో నటించా. అందరూ మంచి వ్యక్తులే.
యాక్టర్‌ అంటే కథ వేరే ఉంటది..!
నటి, నటుడు అంటే కేవలం ఒకే తరహా పాత్రలకు పరిమితం కాకూడదు. నా ఉద్దేశంలో నటన అంటే అన్నిరకాల పాత్రలు చేయాలి. విభిన్నమైన పాత్రల్లో నటించాలని పరిశ్రమలోకి అడుగుపెట్టిన మొదటిరోజే ఫిక్స్‌ అయ్యాను. అందుకు అనుగుణంగానే కేవలం హీరోయిన్‌ పాత్రలు మాత్రమే కాకుండా విలన్‌, క్యారెక్టర్‌ ఆర్టిస్ట్‌.. ఇలా అన్నిరకాల పాత్రల్లో రాణిస్తున్నాను. నా దృష్టిలో నటన అనేది ఒక ఉద్యోగం. మనం విధుల్ని సక్రమంగా నిర్వర్తిస్తే.. ఫలితం కూడా అదే స్థాయిలో ఉంటుంది.
మొదట్లో నో.. ఇప్పుడు హ్యాపీ..!
ఇండస్ట్రీలో నటీనటులు ఎదుర్కొనే ఇబ్బందులు నాన్నకు బాగా తెలుసు. అందుచేతనే.. నేను ఇండస్ట్రీలోకి వెళ్తానని చెప్పగానే నాన్న 'నో' చెప్పారు. ఉన్నత విద్యను పూర్తి చేసిన తర్వాత కూడా నటనపై ఆసక్తి ఉందని చెప్పాను. నా ఇష్టాన్ని కాదనలేక 'ఓకే' చెప్పారు. అలా, మొదటిసారి 'పోడాపోడి'తో నటిగా ఎంట్రీ ఇచ్చాను. ఇప్పుడు వెండితెరపై నా సినిమాలు చూసి ఆయన ఎంతో సంతోషిస్తున్నారు.