పాకిస్థాన్​ వర్షన్​ 'మనీ హైస్ట్​'పై విపరీతంగా ట్రోలింగ్​

లాక్​డౌన్​ సమయంలో నెట్​ఫ్లిక్స్​లో విడుదలై ప్రపంచ వ్యాప్తంగా మంచి ఆదరణ పొందిన 'మనీ హైస్ట్' వెబ్​సిరీస్​, ఇప్పుడు పాకిస్థాన్​లో సినిమాగా రాబోతోంది. '50 క్రోర్‌' పేరుతో తెరకెక్కిస్తున్నారు. అయితే తాజాగా ఈ చిత్రానికి సంబంధించిన పోస్టర్లు, టీజర్లను సోషల్‌మీడియాలో విడుదల చేసింది చిత్రబృందం. టీజర్​ చూసిన నెటిజన్లు సినిమాను విపరీతంగా ట్రోల్‌ చేస్తున్నారు.

ప్రఖ్యాత స్పానిష్​ వెబ్​సిరీస్​ 'మనీ హైస్ట్'ను పాకిస్థాన్​లో '50 క్రోర్‌' అనే పేరుతో రిమేక్​ చేస్తున్నారు. ఈ చిత్రానికి సంబంధించిన టీజర్​, చిత్రాలు చూసిన నెటిజన్లు సినిమాను ట్రోల్‌ చేస్తున్నారు. పాక్‌ వర్షన్ టీజరే ఇంత హాస్యాస్పదంగా ఉంటే సినిమా ఎలా ఉంటుందో అని నవ్వుకుంటున్నారు.

కథేంటీ :

లాక్​డౌన్ సమయంలో బాగా పాపులరైన వెబ్‌ సిరీస్‌ 'మనీ హైస్ట్‌'. ఒక ప్రొఫెసర్‌ ఓ బృందంతో కలిసి స్పెయిన్‌లోని రాయల్‌మింట్‌లో ఎలా దోపిడీ చేశాడన్నది కథ. స్పానిష్‌లో ‘లా కాస డె పాపెల్‌’ పేరుతో 2017లో తీసిన ఈ వెబ్‌సిరీస్‌.. ఇంగ్లీష్‌లో ‘మనీ హైస్ట్‌’ పేరుతో డబ్‌ చేసి నెట్‌ఫ్లిక్స్‌లో విడుదల చేశారు. దీంతో ఈ వెబ్‌సిరీస్‌కు లాక్‌డౌన్‌ కాలంలో ప్రపంచవ్యాప్తంగా మంచి ఆదరణ లభించింది. అయితే తాజాగా ఈ వెబ్‌సిరీస్‌ను పాకిస్థాన్‌లో రీమేక్‌ చేస్తున్నారు.

ఈ చిత్రంలో పాక్‌ నటులు ఖురేషి, మహమూద్‌ అస్లాం, అయిజాజ్‌ అస్లాం, సబూర్‌ అలి, ఫర్యాల్‌ మహమూద్‌, ఝాలే సారాది, అసద్‌ సిద్ధిఖి, నొమన్‌ హబీబ్‌, నవీద్‌ రజా, ఒమర్‌ షాహజద్‌, అనౌషే అబ్బాసి తదితరులు ప్రధాన పాత్రలు పోషిస్తున్నారు.

#50క్రోర్ ట్రోలింగ్​ :

‘ఆ వెబ్‌సిరీస్‌ రేంజ్‌ ఏంటి? ఈ సినిమా రేంజ్‌ ఏంటి’?, ‘అది మనీ హైస్ట్‌.. ఇది మనీ వేస్ట్‌’, ‘ఆ మనీ హైస్ట్‌ 1080 పిక్సెల్‌ అయితే ఈ మనీ హైస్ట్‌(50క్రోర్‌ను ఉద్దేశించి) 240 పిక్సెల్‌’, ‘పాకిస్థాన్‌ వర్షెన్‌ మనీ హైస్ట్‌లో ఆ దేశంలో ఐటీలో డిగ్రీ పొందిన నిరుద్యోగే ఫ్రొఫెసర్‌ అయి ఉంటాడు’, ‘దోపిడీ చేసేది కేవలం 50 కోట్లేనా?’అంటూ కామెంట్లు పెడుతున్నారు. అలా ప్రస్తుతం సోషల్‌మీడియాలో #50క్రోర్​ హ్యాష్‌ట్యాగ్‌ ట్రెండ్‌ అవుతోంది.