పవర్‌స్టార్‌ పవన్ కల్యాణ్ రీ ఎంట్రీ చిత్రం 'పింక్' రీమేక్‌పై సినీ ప్రియుల్లో ఇప్పటికే భారీ అంచనాలు నెలకొని ఉన్నాయి. దీనిపై పవన్ నోటి నుంచి ఎలాంటి అధికారిక ప్రకటన వెలువడనప్పటికీ, తెర వెనుక పనులు మాత్రం శరవేగంగా జరిగిపోతున్నాయి. వేణు శ్రీరామ్‌ దర్శకత్వంలో తెరకెక్కబోయే ఈ చిత్రం కోసం నిర్మాత దిల్‌రాజు ఇప్పటికే పూర్వ నిర్మాణ పనులను పూర్తి చేసేశాడు.
విశ్వసనీయ సమాచారం ప్రకారం ఫిబ్రవరి తొలి వారం నుంచి పవన్ ఈ చిత్ర సెట్స్‌లోకి అడుగుపెట్టబోతున్నట్లు తెలుస్తోంది. ఇదిలా ఉండగా.. ఈ చిత్రం గురించి ఓ ఆసక్తికర విషయం బయటకొచ్చింది. ఈ సినిమాకు స్క్రీన్‌ ప్లే, సంభాషణలను మాటల మాంత్రికుడు త్రివిక్రమ్ రాయబోతున్నట్లు నిన్నమొన్నటి వరకు వార్తలొచ్చాయి. పవన్‌తో ఉన్న స్నేహ బంధాన్ని దృష్టిలో ఉంచుకుని త్రివిక్రమ్ ఈ పనిని చేసిపెడుతున్నట్లు అప్పట్లో గుసగుసలు వినిపించాయి.