త్రిష బర్త్​డే కానుకగా 60వ సినిమా ట్రైలర్​

దక్షిణాది అందాల నాయిక త్రిష కోలీవుడ్​లో వరుస చిత్రాలతో బిజీగా ఉంది. నేడు 36వ పడిలోకి అడుగుపెట్టిన సందర్భంగా... ఆమె కెరీర్​లో​ 60వ సినిమా ట్రైలర్​ను విడుదల చేసింది చిత్రబృందం.

తెలుగు తెరపై అగ్రకథానాయికగా వెలిగిన త్రిష ప్ర‌స్తుతం కోలీవుడ్‌కే పరిమితమైంది. అక్కడే వ‌రుస‌ సినిమాల‌ు చేస్తోంది. తాజాగా కె.తిరుగ‌న‌న‌మ్ ద‌ర్శ‌క‌త్వంలో 'ప‌ర‌మ‌ప‌దం విల‌య‌ట్టు' చిత్రంలో నటిస్తోంది. ఇది త్రిష‌ కెరీర్​లో​ 60వ సినిమా. ఈ రోజు త్రిష 36వ పుట్టినరోజు సంద‌ర్భంగా ట్రైల‌ర్​ విడుద‌ల చేశారు. ఇందులో త్రిష బధిర చిన్నారికి త‌ల్లిగా న‌టించింది. పొలిటిక‌ల్ థ్రిల్ల‌ర్‌గా రూపొందుతున్న ఈ చిత్రంలో త్రిష మరోసారి తనలోని ప్రతిభను బయటపెట్టింది.

24 అవర్స్ ఎంట‌ర్‌టైన్‌మెంట్ బ్యానర్​పై ఈ చిత్రం నిర్మితమవుతోంది. అమ్రీష్ సంగీతం అందించారు. మురుగ‌దాస్ శిష్యుడు శ‌ర‌వ‌ణ‌న్ ద‌ర్శ‌క‌త్వంలో త్రిష మరో ప్రాజెక్ట్​కు సంతకం చేసింది. ‘రాంగి’ అనే టైటిల్​తో ఇటీవలే చిత్రీకరణ ప్రారంభమైంది.

ఇటీవల త్రిష నటించిన '96', 'పేట' చిత్రాలు మంచి విజ‌యం సాధించాయి. త్రిష ప్ర‌స్తుతం త‌న త‌ల్లి ఉషా క్రిషన్‌తో క‌లిసి అమెరికాలో విహారంలో ఉంది.