మెగాస్టార్‌ మేనల్లుడు... అల్లువారసుడు... అతడే అల్లు అర్జున్. టాలీవుడ్లో స్ట్రైలిష్ స్టార్గా తనకంటూ ప్రత్యేక గుర్తింపు తెచ్చుకున్నాడు. గంగోత్రితో వెండితెరకు పరిచయమైన అల్లు... ఇటీవల విడుదలైన 'అల వైకుంఠపురంలో' వరకు విజయాలతో రికార్డ్స్‌ సృష్టించాడు. నేడు ఈ స్టైలిష్ స్టార్ పుట్టినరోజు సందర్భంగా అతడి సినీ జర్నిపై ఓ లుక్కేద్దాం.
అల్లు రామలింగయ్య సినీ వారసుడు
అల్లు అర్జున్ 1982 ఏప్రిల్‌ 8న (తమిళనాడు) చెన్నైలోని ప్రముఖ నిర్మాత అల్లు అరవింద్, నిర్మలకు జన్మించాడు. తన హావభావాలతో, హాస్య వల్లరితో కొన్ని దశాబ్దాలు తెలుగు తెరపై నవ్వులు పూయించిన ప్రముఖ హాస్య నటుడు అల్లు రామలింగయ్య... అల్లు అర్జున్కు తాతయ్య. అల్లు అర్జున్ మేనత్త సురేఖ టాలీవుడ్ మెగాస్టార్‌ చిరంజీవిని వివాహం చేసుకొంది. అర్జున్ ముద్దు పేరు బన్నీ. ఆ పేరుతో కూడా సినిమా వచ్చింది. యువ హీరో అల్లు శిరీష్‌... బన్నీకి సోదరుడు. అల్లు వెంకటేష్‌ అనే మరో సోదరుడు కూడా ఉన్నాడు.
బాలనటుడిగా విజేత
'విజేత' సినిమాలో అల్లు అర్జున్ ఓ బాల నటుడి పాత్రలో నటించాడు. ఆ తరువాత 'డాడీ' చిత్రంలో డాన్సర్‌గా కనిపించాడు. ఆ తరువాత రాఘవేంద్రరావు సినిమా 'గంగోత్రి'తో కథానాయకుడిగా పరిచయమయ్యాడు అల్లు అర్జున్. ఇది దర్శకేంద్రుడు రాఘవేంద్రరావుకి వందవ సినిమా. ఆ తరువాత సుకుమార్‌ దర్శకత్వంలో వచ్చిన 'ఆర్య' సినిమాలో నటించాడు.
అనంతరం 'బన్నీ', 'హ్యాపీ', 'దేశముదురు', 'పరుగు'తో సినిమాలు చేశాడు. వీటిలో బన్నీ, దేశముదురు అల్లు అర్జున్కు ప్రత్యేక గుర్తింపు వచ్చింది.
చిరంజీవి హీరోగా వచ్చిన 'శంకర్‌ దాదా జిందాబాద్‌'లో అతిధి పాత్రలో తళుక్కుమని మెరిసి ప్రేక్షకులను ఆశ్చర్యపరిచాడు. ఆ తరువాత సుకుమార్‌ దర్శకత్వంలో తెరకెక్కిన సైకలాజికల్‌ యాక్షన్‌ డ్రామా 'ఆర్య 2'లో నటించాడు. అనంతరం 2010లో రెండు ప్రయోగాత్మకమైన సినిమాల ద్వారా ప్రేక్షకులను పలకరించాడు అల్లు అర్జున్. వాటిలో మొదటిది గుణశేఖర్‌ దర్శకత్వంలో వచ్చిన 'వరుడు' సినిమా కాగా రెండవది క్రిష్‌ డైరెక్షన్‌లో వచ్చిన 'వేదం' సినిమా. ఆ తరువాత 'బద్రీనాథ్‌','జులాయి' ,'ఇద్దరమ్మాయిలతో' సినిమాల్లో నటించాడు.