హీరోయిన్ అంటే పూర్తిగా మేకప్.. మోడ్రన్ దుస్తులు.. పాటల్లో మాత్రమే డ్యాన్సులు.. అనే పద్ధతికి నేటి తరంలోని కొందరు భామలు కుదరదని చెప్పేస్తున్నారు! హీరోలకు తామేం తక్కువ కాదు, ఎలాంటి పాత్రనైనా సరే చేస్తామని ముందుకొస్తున్నారు. ఈ క్రమంలోనే డీ గ్లామర్ రోల్స్కు కూడా సై అంటున్నారు. ఇటీవలే వచ్చిన సదరు ఫస్ట్లుక్స్ ఆ విషయాన్ని పక్కగా చెబుతున్నాయి. సినిమాలపై అంచనాల్ని పెంచుతున్నాయి.
కీర్తి సురేశ్- సాని కాయిదం
లాక్డౌన్ వేళ హీరోయిన్ కీర్తి సురేశ్ నటించిన 'పెంగ్విన్', 'మిస్ ఇండియా' సినిమాలు ఓటీటీల్లో విడుదలయ్యాయి. ఇప్పుడు కొత్త చిత్రం 'సాని కాయిదం' ఫస్ట్లుక్తో ప్రేక్షకుల ఒక్కసారిగా షాకయ్యారు. ఈ పోస్టర్లో హత్య చేసిన నేరస్థురాలిగా కీర్తి కనిపించింది. ప్రముఖ దర్శకుడు సెల్వరాఘవన్ కీలక పాత్ర పోషిస్తున్నారు.
పాయల్ రాజ్పుత్ - అనగనగా ఓ అతిథి
ఇప్పటివరకు హీరోయిన్గా, ప్రత్యేక గీతాల్లో నర్తించిన పాయల్.. 'ఆహా' వెబ్ చిత్రం 'అనగనగా ఓ అతిథి'లో పల్లెటూరి మహిళగా కనిపించనుంది. ఇటీవలే వచ్చిన టీజర్, అందులోని పాయల్ నటన ఆకట్టుకుంటోంది.