గాంధీ 150వ జయంతి సందర్భంగా దేశవ్యాప్తంగా సంబరాలు జరుగుతున్నాయి. బాలీవుడ్ నుంచి టాలీవుడ్ వరకు బాక్సాఫీస్ వద్ద సందడి చేసేందుకు సినిమాలు క్యూ కడుతున్నాయి. ఈ రోజు విడుదల కాబోతున్నాయి. ఈ కారణంగా ఒకేరోజు బాక్సాఫీస్ వద్ద వసూళ్ల వర్షం కురవబోతుంది.
సై అంటున్న సైరా..
మెగాస్టార్ చిరంజీవి 151వ చిత్రం సైరా: నరసింహారెడ్డి. రూ. 300 కోట్ల పైచిలుకు బడ్జెట్తో రూపొందిన ఈ సినిమా బుధవారం ప్రేక్షకుల ముందుకు రానుంది. స్వాతంత్ర్య సమరయోధుడు ఉయ్యాలవాడ నరసింహారెడ్డి జీవితం ఆధారంగా తెరకెక్కిన ఈ సినిమాకు సురేందర్ రెడ్డి దర్శకత్వం వహించాడు. ఇప్పటికే విడుదలైన చిత్ర ట్రైలర్లు, మేకింగ్ వీడియోలు, పాటలతో సినిమాపై భారీ అంచనాలు ఏర్పాడ్డాయి.
అమితాబ్ బచ్చన్, విజయ్ సేతుపతి, కిచ్చా సుదీప్, జగపతి బాబు లాంటి భారీ తారాగణం నటించిన ఈ సినిమా పాన్ ఇండియా చిత్రంగా ప్రేక్షకుల ముందుకు రానుంది. నయనతార, తమన్నా కథానాయికలుగా నటిస్తున్నారు. కొణిదెల ప్రొడక్షన్స్ బ్యానర్పై రామ్చరణ్ నిర్మిస్తున్నాడు.
హృతిక్ - టైగర్ వార్..
బాలీవుడ్ హీరోలు హృతిక్ రోషన్, టైగర్ ష్రాఫ్ కలిసి నటించిన చిత్రం వార్. ఈ సినిమా కూడా గాంధీ జయంతి పురస్కరించుకుని విడుదల కానుంది. హిందీతో పాటు తెలుగు, తమిళ భాషల్లోనూ అనువాదమైంది. బాలీవుడ్ భారీ యాక్షన్ థ్రిల్లర్గా తెరకెక్కిన ఈ చిత్రంలో సైరాతో పోటీపడనుంది. సిద్ధార్థ్ ఆనంద్ దర్శకత్వం వహించాడు. యశ్ రాజ్ ఫిల్మ్స్ బ్యానర్పై ఆదిత్య చోప్రా నిర్మిస్తున్నాడు.
జోకర్ నవ్విస్తాడా.. కవ్విస్తాడా..
డీసీ కామిక్స్ సృష్టించిన ప్రతినాయకుల్లో ప్రపంచవ్యాప్తంగా ఎంతో గుర్తింపుతెచ్చుకున్న విలన్ జోకర్. ముఖ్యంగా బ్యాట్మ్యాన్ను ముుప్పుతిప్పలు పెట్టి.. అత్యంత క్రూరమైన విలన్గా పేరుగాంచాడు జోకర్. అతడు ఎందుకు అలా మారాడో ఈ సినిమాలో చూపించనున్నారు. ఆర్థర్ ఫ్లెక్ అనే స్టాండప్ కమెడియన్ తన వృత్తిలో రాణించలేకపోతాడు. అంతే కాకుండా సమాజం నుంచి ఎన్నో అవమానాలకు గురై.. క్రిమినల్గా మారతాడు. ఇందులో జాక్విన్ ఫీనిక్స్ ప్రధాన పాత్ర పోషించాడు.
ఈ వారంలో మరో రెండు సినిమాలు..
ఇవి గాకుండా ఈ వారంలో తమిళంలో 100% కాదల్, అసురన్ చిత్రాలు ప్రేక్షకుల మందుకు రానున్నాయి. నాగచైతన్య నటించిన 100% లవ్ చిత్రానికి రీమేక్గా నిర్మించిన 100% కాదల్లో జీవీ ప్రకాశ్ నటించాడు. ఈ చిత్రం శుక్రవారం విడుదల కానుంది.ఇందులో షాలిని పాండే కథానాయిక. ‘అసురన్’లో భిన్నమైన గెటప్‌లో నటించిన ధనుష్‌ జాతీయ అవార్డుపై దృష్టి పెట్టిపెట్టినట్లు సమాచారం.
ఇదీ చదవండి: సైరాతో మాకు పోటీ లేదు: వార్ హీరో టైగర్
