ప్రియాంకా చోప్రా, కత్రినా కైఫ్, దీపికా పదుకొణె.. వీరంతా ప్రస్తుతం బాలీవుడ్లో స్టార్ హీరోయిన్లుగా వెలుగొందుతున్నారు. కొందరైతే హాలీవుడ్లోనూ అవకాశాలతో ప్రపంచవ్యాప్తంగా గుర్తింపు తెచ్చుకున్నారు. హీరోలకు తగ్గట్టుగా పారితోషికం అందుకుంటూ జోరు చూపిస్తున్నారు. అయితే ఇంత ఎదిగిన వీరు దక్షిణాది సినిమాలతోనే కెరీర్ ప్రారంభించిన విషయం మీకు తెలుసా. వీరే కాదు.. ఇలా స్టార్ హీరోయిన్లుగా పేరు సంపాదించిన మరికొందరు కూడా మొదట సౌత్లోనే అడుగుపెట్టారు. వారెవరో చూద్దాం.
ప్రియాంకా చోప్రా
ప్రస్తుతం హాలీవుడ్లో వరుస అవకాశాలు దక్కించుకుంటూ దూసుకెళ్తోంది ప్రియాంకా చోప్రా. అయితే ఈమె హీరోయిన్గా చేసిన మొదటి చిత్రం కోలీవుడ్లోనే. విజయ్ హీరోగా నటించిన 'తమిజాన్' సినిమాతో తన కెరీర్ను ప్రారంభించింది ప్రియాంక. తర్వాత బాలీవుడ్కు మకాం మార్చి స్టార్ హీరోయిన్గా వెలుగొందుతోంది.
ఐశ్వర్యా రాయ్
మిస్ వరల్డ్ టైటిల్ నెగ్గి అందరి దృష్టినీ ఆకర్షించింది ఐశ్వర్యా రాయ్. అంతటి ఘనత దక్కించుకున్నా మొదట బాలీవుడ్లో అవకాశాలు దక్కించుకోలేకపోయింది. ఐశ్వర్య వెండితెరకు పరిచయమైన చిత్రం 'ఇద్దరు'. మణిరత్నం దర్శకత్వం వహించిన ఈ సినిమా హిట్ కావడం వల్ల బాలీవుడ్లోనూ వరుస అవకాశాలు దక్కించుకుంది.
దిశా పటానీ
ప్రస్తుతం బాలీవుడ్లో మోస్ట్ సెక్సీయెస్ట్ హీరోయిన్గా జోరు చూపిస్తోంది దిశా పటానీ. అగ్రనటుల సరసన అవకాశాలు దక్కించుకుంటూ దూసుకెళ్తోంది. అయితే ఈ హీరోయిన్ మొదటగా చేసిన చిత్రం 'లోఫర్'. వరుణ్ తేజ్ హీరోగా నటించిన ఈ సినిమాకు పూరీ జగన్నాథ్ దర్శకత్వం వహించారు.
కృతి సనన్
బాలీవుడ్లో పేరు సంపాదించుకున్న మరో నటి కృతి సనన్. ప్రస్తుతం ప్రభాస్ సరసన 'ఆదిపురుష్'లో నటిస్తోంది. అలాగే హిందీ సినీ పరిశ్రమలో మోస్ట్ హ్యాపెనింగ్ స్టార్గా వెలుగొందుతోంది. అయితే ఈ భామ కెరీర్ ప్రారంభమైంది కూడా టాలీవుడ్లోనే. మహేశ్ బాబు హీరోగా సుకుమార్ దర్శకత్వం వహించిన '1 నేనొక్కడినే' చిత్రంతో హీరోయిన్గా పరిచయమైంది కృతి.
దీపికా పదుకొణె
ప్రియాంకా చోప్రా తర్వాత హాలీవుడ్ అవకాశం దక్కించుకుంది దీపికా పదుకొణె. ప్రస్తుతం బాలీవుడ్లో స్టార్ హీరోయిన్గా గుర్తింపు తెచ్చుకుని హీరోలకు పోటీగా పారితోషికం తీసుకుంటూ దూసుకెళ్తోంది. అయితే దీపిక కూడా దక్షిణాది చిత్రంతోనే వెండితెరకు పరిచయమైంది. ఉపేంద్ర హీరోగా వచ్చిన 'ఐశ్వర్య' అనే కన్నడ సినిమాతో తన కెరీర్ ప్రారంభించింది దీపిక.
తాప్సీ
మహిళా ఓరియెంటెడ్ చిత్రాలతో పాటు విభిన్న పాత్రలు చేస్తూ బాలీవుడ్లో మకాం వేసింది తాప్సీ. విలక్షణమైన కథలను ఎంచుకుంటూ విమర్శకుల ప్రశంసలూ అందుకుంటోంది. అయితే తాప్సీ హీరోయిన్గా చేసిన మొదటి చిత్రం 'ఝుమ్మంది నాదం'. దర్శకేంద్రుడు రాఘవేంద్రరావు తెరకెక్కించిన ఈ సినిమాలో మంచు మనోజ్ సరసన ఆడిపాడింది తాప్సీ.
