తెలుగు చిత్రసీమలో చాలామంది కథానాయకులు ఉన్నారు. వారిలో ఒక్కొక్కరిది ఒక్కో మనస్తత్వం. సినిమాలు ఎప్పుడైనా మనిషికి ఆనందాన్ని, ఆహ్లాదాన్ని ఇచ్చేవిగా ఉండాలని చెబుతుంటారు నందమూరి బాలకృష్ణ. అయితే కొంతమంది హీరోలు వారికున్న క్రేజ్తో సినిమాల్లోనే కాకుండా వాణిజ్య ప్రకటనల్లోనూ కనిపించి సందడి చేస్తుంటారు. అయితే బాలకృష్ణ మాత్రం ఇప్పటివరకు ఎలాంటి వాణిజ్య ప్రకటనల్లోనూ కనిపించలేదు. దానికి ఓ కారణం ఉందని అంటున్నారు బాలకృష్ణ.
"అసలు వాణిజ్య ప్రకటనల్లో కనిపించకపోవడానికి చాలా పెద్ద కారణం ఉంది. మా నాన్న ఎన్టీఆర్‌ ఏనాడు వాణిజ్య ప్రకటనల్లో కనిపించలేదు. 'మనకు ఇంతటి పేరు ప్రఖ్యాతులను ఇచ్చింది ప్రేక్షక దేవుళ్లే. అలాంటి వారి నమ్మకానికి, అభిమానానికి వెల కట్టి, ప్రకటనల్లో నటించి.. మళ్లీ డబ్బు సంపాదించడం మంచిది కాద'న్నారు. అందుకే నేను ఆయన బాటలోనే నడుస్తున్నాను".