ఆమె జీవిత కథ విని హీరో సూర్య కన్నీటి పర్యంతం

కోలీవుడ్​ హీరో సూర్య.. అగరం ఫౌండేషన్​ స్థాపించి, పలు స్వచ్ఛంద కార్యక్రమాలు చేస్తున్నాడు. ఇప్పుడు ఈ సంస్థకు సంబంధించిన ఓ పుస్తకాన్ని విడుదల చేశాడు. ఈ కార్యక్రమంలో పాల్గొన్న ఈ కథానాయకుడు.. భావోద్వేగానికి గురయ్యాడు.

తమిళ స్టార్ హీరో సూర్య కన్నీటి పర్యంతమయ్యాడు. ఇప్పటికే చిన్నారుల కోసం 'అగరం ఫౌండేషన్‌'ను స్థాపించి పలు స్వచ్ఛంద కారక్రమాలు చేస్తున్నాడు. ఇప్పుడీ సంస్థకు సంబంధించిన ఓ పుస్తకాన్ని విడుదల చేశారు. ఈ సందర్భంగా ఏర్పాటు చేసిన కార్యక్రమంలో, ఫౌండేషన్‌ నుంచి సహాయం పొందుతున్న గాయత్రి తన కష్టాల గురించి చెప్పింది. సంస్థ ఆదుకోవడం వల్ల సాధించిన విజయాల్ని, తన ప్రయాణాన్ని వెల్లడించింది.

"మాది చిన్న పల్లెటూరు. తండ్రి రోజూ కూలి పని చేస్తాడు. చదువుల కోసం ఫౌండేషన్‌ సహాయం తీసుకొని కళాశాల విద్య పూర్తి చేసుకున్నా. ప్రస్తుతం ఇంగ్లీష్ ట్రైనర్‌గా పనిచేస్తున్నా. నా విజయానికి కారణం ఫౌండేషన్‌" అంటూ భావోద్వేగానికి గురైంది.

ఆమె కథ విన్న సూర్య హృదయం చలించిపోయింది. భావోద్వేగాన్ని ఆపుకోలేకపోయాడు. చిన్నపిల్లాడిలా కన్నీరుపెట్టుకుని పైకి లేచి.. గాయత్రి వద్దకు వెళ్లి అమ్మాయిని ఆప్యాయంగా పట్టుకున్నాడు. ఈ వీడియో ప్రస్తుతం వైరల్‌ అవుతోంది. సూర్యది మంచి మనసని అందరూ మెచ్చుకుంటున్నారు.

'అగరం' ఫౌండేషన్‌ను స్థాపించి పదేళ్లవుతోంది. తనను నటుడిగా స్వీకరించిన ప్రజలు, సమాజానికి సేవ చేసే ఉద్దేశంతో దీన్ని ప్రారంభించినట్లు సూర్య చెప్పాడు. ఈ సంస్థ కోసం విరాళాలు అందిస్తున్న శ్రేయోభిలాషులు, దాతలకు ధన్యవాదాలు తెలిపాడు.

ఇవీ చూడండి.. మిమ్మల్ని నిరాశ పరుస్తున్నా.. క్షమించండి..!