'శభాష్ మిథు' కోసం ప్రాక్టీస్ షురూ చేసిన తాప్సీ

టీమ్ఇండియా మహిళా క్రికెటర్ మిథాలీ రాజ్​ జీవితాధారంగా 'శభాష్ మిథు' అనే చిత్రం తెరకెక్కుతోంది. తాప్సీ హీరోయిన్​గా చేస్తోంది. తాజాగా ఈ పాత్ర కోసం ప్రాక్టీస్ మొదలుపెట్టింది తాప్సీ.

భారత స్టార్ క్రికెటర్లు ధోనీ, సచిన్ తెందుల్కర్​ల బయోపిక్​లు ఇప్పటికే వెండితెరపై సందడి చేశాయి. ఈ జాబితాలోకి మరో సినిమా వచ్చి చేరింది. అదే హీరోయిన్ తాప్సీ నటిస్తున్న 'శభాష్​ మిథు'. భారత మహిళా క్రికెటర్ మిథాలీ రాజ్​ జీవితం ఆధారంగా తీస్తున్నారు. తాజాగా ఈ సినిమా కోసం ప్రాక్టీస్ షురూ చేసింది తాప్సీ. తాను నటిస్తోన్న 'రష్మి రాకెట్' చిత్రీకరణ సోమవారం ముగించుకుని మిథాలీ బయోపిక్​ కోసం కసరత్తులు మొదలుపెట్టింది.

ఇందుకు సంబంధించిన ఫొటో సామాజిక మాధ్యమాల్లో షేర్ చేస్తూ "బ్యాట్​, బంతితో రొమాన్స్ మొదలైంది. చాలా దూరం ప్రయాణించాలి. కానీ సరైన ప్రారంభం లభిస్తే సగం పని అయిపోయినట్లే. మిథాలీ, చిత్రబృందం, నాకు ఇది మరో మైలురాయిలా నిలిచిపోతుంది" అంటూ క్యాప్షన్ ఇచ్చింది తాప్సీ.

'పర్జానియా', 'రాయిస్'​కు దర్శకత్వం వహించిన రాహుల్ ధోలాకియా ఈ చిత్రాన్ని తెరకెక్కిస్తున్నారు. వయాకామ్ 18 స్టూడియోస్ నిర్మిస్తోంది.