సుశాంత్ బిల్​బోర్డు తొలగింపు.. శ్వేత ఆగ్రహం

బాలీవుడ్ నటుడు సుశాంత్​ సింగ్ రాజ్​పుత్​కు సంబంధించిన బిల్​బోర్డును తొలగించేందుకు సిద్ధమైంది అమెరికా మీడియా సంస్థ. దీనిపై సుశాంత్ సోదరి శ్వేతా సింగ్ ఆగ్రహం వ్యక్తం చేసింది.

బాలీవుడ్ నటుడు సుశాంత్ సింగ్ రాజ్​పుత్ ఆత్మహత్య ప్రస్తుతం దేశంలో చర్చనీయాంశంగా మారింది. దీనిపై సీబీఐ విచారణ కొనసాగుతోంది. అయితే సుశాంత్​కు న్యాయం జరగాలని కొందరు అభిమానులు అమెరికాలో బిల్​బోర్డులు ఏర్పాటు చేశారు. తాజాగా వీటిని తొలగించాలని నిర్ణయం తీసుకుంది అమెరికా మీడియా సంస్థ. ఈ విషయాన్ని సుశాంత్ సోదరి శ్వేతా సింగ్​కు మెయిల్​ ద్వారా తెలియజేసింది. దీనికి సంబంధించిన స్క్రీన్ షాట్లను సోషల్ మీడియాలో షేర్ చేసింది శ్వేత.​

"అమెరికా మీడియా సంస్థ ఆ బిల్​బోర్డులను పెట్టడం వెనుక గల కారణాలను తెలుసుకోలేదు. కేవలం ఈ ప్రచారం ద్వారా సుశాంత్​తో సంబంధం ఉన్న ఓ మహిళను కించపరిచే ప్రయత్నం చేస్తున్నారని అనుకుంటోంది. బిల్​బోర్డు ద్వారా న్యాయం మాత్రమే కోరుకుంటున్నాం." అంటూ రాసుకొచ్చింది శ్వేత.

జూన్ 14న సుశాంత్ తన నివాసంలో ఉరివేసుకుని ఆత్మహత్యకు పాల్పడ్డాడు. అయితే సుశాంత్ సూసైడ్ చేసుకోలేదని అది హత్య అంటూ అతడి కుటుంబం ఆరోపిస్తోంది. రాజ్​పుత్ మరణానికి కారణం తన ప్రేయసి రియా చక్రవర్తే అంటూ చెబుతోంది. ఈ విషయంపై ప్రస్తుతం సీబీఐ విచారణ కొనసాగుతోంది.