'నిద్ర లేస్తే ఆలోచనంతా నీ గురించే సుశాంత్​'

సుశాంత్​ సింగ్​ రాజ్​పుత్​కు ఎలా వీడ్కోలు పలకాలో తెలియడం లేదంటూ నటి భూమిక ఆవేదన వ్యక్తం చేసింది. ఇన్​స్టాగ్రామ్​ ద్వారా ఎమోషనల్​ పోస్ట్​ చేస్తూ.. బాలీవుడ్​లో మనుగడ సాగించడం ఎంతకష్టమో వివరించింది. ​

బాలీవుడ్​ హీరో సుశాంత్​ సింగ్​ రాజ్​పుత్​ చనిపోయి 20రోజులు దాటిపోయింది. అయితే, నటి భూమిక అతని జ్ఞాపకాలకు దూరంగా వెళ్లలేకపోతున్నట్లు ఆవేదన వ్యక్తం చేసింది. తాజాగా ఇన్​స్టాగ్రామ్​ వేదికగా భావోద్వేగ పోస్టు చేస్తూ.. సుశాంత్​కు వీడ్కోలు ఎలా పలకాలో తెలియడం లేదంటూ చెప్పింది. ఇప్పటికీ నటుడి ఆకస్మిక మరణం వెనక ఉన్న కారణాల గురించి ఆలోచిస్తున్నట్లు వెల్లడించింది. మరోవైపు హిందీ పరిశ్రమలో మనుగడ సాగించడం ఎంత కష్టమో తెలిపింది. బాలీవుడ్​, దక్షిణాది సినిమాల్లో నటించిన ఈ నటి.. తన ఎమోషనల్​ పోస్ట్​లో సుశాంత్​ మృతికి మానసిక ఒత్తిడి కారణమైతే ఎవరితోనైనా బాధను పంచుకోవాలని అప్పుడే సమస్య పరిష్కారమవుతుందని తెలిపింది.

ఇప్పటివరకు 50కిపైగా సినిమాలు చేసినప్పటికీ.. తాను ఒక పాత్ర కోసం చిత్రనిర్మాతలతో సంప్రదింపులు జరుపుతూనే ఉంటానని వివరించింది.అయితే, తనకు ఇంకా సినిమాల్లో అవకాశాలు కల్పిస్తున్నందుకు కృతజ్ఞతలు తెలిపింది. ఇలా సుశాంత్​కు వేదనతో తుది వీడ్కోలు పలికింది భూమిక.

సుశాంత్​ ముంబయిలోని తన ఇంట్లో రెండు వారాల క్రితం ఆత్మహత్య చేసుకున్నాడు. బాలీవుడ్​ నటుడి మృతితో అభిమానులు, కుటుంబ సభ్యులు షాక్​కు గురయ్యారు. ప్రస్తుతం ఈ ఘటనపై పోలీసుల దర్యాప్తు జరుగుతోంది. సుశాంత్​ ఇటువంటి నిర్ణయం తీసుకోవడానికి గల కారణాలను తెలుసుకునే ప్రయత్నాలు చేస్తున్నారు పోలీసులు.

ఇదీ చూడండి:'ఆ రహస్యం నీతో పాటే వెళ్లిపోయింది సుశాంత్​'