Super Hero Shaktiman: దేశీయ సూపర్ హీరో 'శక్తిమాన్' గురించి ప్రత్యేకంగా చెప్పనక్కర్లేదు. 1990 నుంచి 2000వరకు డీడీ నేషనల్లో ప్రసారమైన ఈ సీరియల్ ఎంతో ప్రజాదరణ పొందింది. ఇప్పుడీ ధారావాహికను సినిమాగా రూపొందించేందుకు సిద్ధమైంది ప్రముఖ నిర్మాణ సంస్థ సోనీ పిక్చర్స్. ఓ బడా హీరో టైటిల్ రోల్ పోషిస్తారని, ఓ ప్రముఖ దర్శకుడు దీన్ని తెరకెక్కిస్తారని తెలిపింది. త్వరలోనే వివరాలను ప్రకటిస్తామని పేర్కొంది. అప్పట్లో శక్తిమాన్గా ముకేశ్ ఖన్నా ప్రధాన పాత్రలో నటించారు.
పవర్‌ఫుల్‌గా 'సన్ ఆఫ్ ఇండియా' ట్రైలర్..
Mohanbabu Son of India trailer: 'ప్రపంచమంతా నా కుటుంబం. ప్రపంచం బాధే నా బాధ' అని అంటున్నారు ప్రముఖ నటుడు మోహన్‌బాబు. ఆయన హీరోగా నటించిన 'సన్ ఆఫ్ ఇండియా' చిత్రంలోని సంభాషణ ఇది. ఈ సినిమాను ఫిబ్రవరి 18న ప్రేక్షకుల ముందుకు తీసుకొస్తున్న నేపథ్యంలో చిత్ర బృందం ట్రైలర్‌ను విడుదల చేసింది. 'ప్రపంచంలోని ఏ పోరాటమైనా ఒకడితోనే ప్రారంభమవుతుంది' అనే డైలాగ్‌తో ప్రారంభయ్యే ట్రైలర్ ఆద్యంతం పవర్‌ఫుల్‌గా సాగింది. ఈ ప్రచార చిత్రంలో మోహన్‌బాబు విభిన్నమైన లుక్స్‌లో.. చాలా శక్తిమంతంగా కనిపించారు. ఆయన చెప్పిన ప్రతి సంభాషణ ప్రేక్షకుల్ని ఆలోచింపజేసేలా ఉంది. ఆఖర్లో.. ‘మీ ప్రశ్నలన్నింటికీ సమాధానం మీతోపాటు 138 కోట్ల భారతీయులకు వివరంగా చెబుతా’ అని మోహన్‌బాబు ఫోన్లో చెప్పే మాట ప్రత్యేక ఆకర్షణగా నిలిచింది. ఆ సమాధానం ఏంటో సినిమా చూసి తెలుసుకోవాల్సిందే.