'మహేశ్​ భట్​ను సీబీఐ విచారణకు పిలిచిందా?'

బాలీవుడ్​ నటుడు సుశాంత్​, రియాల ప్రేమ వ్యవహారంలో మహేశ్​ భట్​ పాత్ర ఏంటని అనుమానం వ్యక్తం చేసింది నటి సుచిత్ర కృష్ణమూర్తి. సుశాంత్​ మృతి కేసులో మహేశ్​ భట్​కు సమన్లు జారీ చేశారా? అంటూ ట్విట్టర్​ వేదికగా ప్రశ్నించింది.

దివంగత నటుడు సుశాంత్​సింగ్​ రాజ్​పుత్​, రియా చక్రవర్తి మధ్య ఉన్న సంబంధంలో.. దర్శకుడు మహేశ్​ భట్​ పాత్ర ఏంటని ప్రశ్నించింది బాలీవుడ్​ నటి సుచిత్ర కృష్ణమూర్తి. ప్రస్తుతం జరుగుతున్న సుశాంత్​ కేసు దర్యాప్తులో మహేశ్​ భట్​కు సీబీఐ సమన్లు జారీ చేసిందా? అనే విషయాన్ని తెలుసుకోవాలని అనుకుంటోంది. ఈ మేరకు ట్విట్టర్​లో స్పందించింది సుచిత్ర.

"మహేశ్​ భట్​ను సీబీఐ విచారణకు పిలిచిందా? జూన్​ 8వ తేదీన సుశాంత్​ నివాసాన్ని రియా ఎందుకు విడిచిపెట్టి వచ్చింది" అని ట్వీట్​ చేసింది నటి సుచిత్ర కృష్ణమూర్తి.

రియా, మహేశ్ భట్​ చాటింగ్​

నటి రియా, మహేశ్​ భట్​ వాట్సాప్​ చాటింగ్​ అంటూ సామాజిక మాధ్యమాల్లో కొన్ని స్క్రీన్​షాట్లు వైరల్​ అయ్యాయి. అందులో జూన్​ 8న రియా తన ప్రియుడైన సుశాంత్​ నివాసాన్ని విడిచి వచ్చినట్లు మహేశ్​ భట్​కు సందేశాన్ని పంపింది. దానికి మహేశ్​ భట్​.. "వెనక్కి తిరిగి చూడకు. అసాధ్యాన్ని సుసాధ్యం చేసి చూపించు" అని జవాబిచ్చారు.

సుశాంత్​ను రియా ప్రేమించడం పట్ల ఆమె తండ్రి ఆనందంగా లేరని ఈ సంభాషణ ద్వారా మహేశ్​ భట్​ చెప్పినట్లు స్క్రీన్​షాట్ల ద్వారా తెలుస్తోంది. సుశాంత్​ మృతి తర్వాత సోషల్​మీడియాలో విపరీతమైన ట్రోలింగ్స్​ను ఎదుర్కొన్నారు దర్శకుడు మహేశ్​ భట్​.