సూపర్ సినిమాతో తెలుగు సినిమాలోకి ఎంట్రీ ఇచ్చిన అనుష్క.. కుర్రకారు హృదయాలను దోచుకుంది. వైవిధ్యమైన పాత్రలతో నటిగా తిరుగులేని పేరు సంపాదించుకుంది. యోగా టీచర్గా పని చేసిన స్వీటీ.. సినిమాల్లోకి ఎలా వచ్చింది? ఆ తర్వాత నుంచి తన ప్రయాణం ఎలా సాగుతోందో? ఇప్పుడు చూద్దాం..
అలా అవకాశం..
పూరీ జగన్నాథ్‌ 'సూపర్'లో నటి కోసం చూస్తున్న రోజులవి. ఆ సమయంలో ఆయన స్నేహితుడు యోగా టీచర్ అనుష్క గురించి చెప్పారు. అప్పుడు పూరీ.. అనుష్కను సంప్రదించారు. అలా ఆమె హైదరాబాద్‌కు వచ్చి తొలి అవకాశం చేజిక్కించుకున్నారు. పొట్టి దుస్తులు వేసుకుని కెమెరా ముందు నటించడం ఇబ్బందిగా భావించి అనుష్క అనేకసార్లు కన్నీరు పెట్టుకున్నారు. పట్టుదలతో సవాళ్లను ఎదుర్కొని, నిలదొక్కుకున్నారు. 'యోగా టీచర్గా పనిచేస్తున్నప్పుడు పూరీ జగన్నాథ్‌ను కలవడాన్ని మర్చిపోలేను. 2005లో ఆ ఒక్క రోజే నా జీవితాన్ని ఊహించని విధంగా మార్చేసింది' అని ఓసారి చెప్పారు.
ఆ పేరు తనకు తానే..
అనుష్క అసలు పేరు స్వీటీ శెట్టి. సినిమాల్లోకి వచ్చిన తర్వాత తన పేరును మార్చుకున్నారు. 'నా అసలు పేరు స్వీటీ. మా పిన్ని పెట్టింది. అమ్మవాళ్లు ప్రతి సంవత్సరం మారుస్తాం అని మాటిస్తూ.. పదో తరగతి వరకు తీసుకొచ్చారు. ఇంటర్‌లో అడ్మిషన్‌ అప్పుడు స్వీటీ అని రాస్తే 'ముద్దు పేరు బావుంది. కానీ అసలు పేరు రాయి' అన్నప్పుడు ఏదోలా అనిపించింది' అని ఓసారి అనుష్క గుర్తు చేసుకున్నారు. 23 ఏళ్ల వయసులో సెట్‌లో 'స్వీటీ' అని పిలుస్తుంటే బాగోలేదన్నారట. దీంతో ఆమె తనకు తానే అనుష్క అని పేరు పెట్టుకున్నారు. ఈ పేరుకు అలవాటు పడటానికి ఏడాది పట్టిందట.
ఆ భయంతో కాలేజీకి వెళ్లలేదు..
యువతలో 'దేవసేన'కున్న క్రేజ్‌ గురించి ప్రత్యేకంగా చెప్పాల్సిన అవసరం లేదు. సోషల్‌ మీడియా వేదికగా ఎందరో అభిమానులు అనుష్కకు తమ ప్రేమను తెలుపుతున్నారు. ఆమె కాలేజీలో చదువుతున్న రోజుల్లో ఓ వ్యక్తి వెంటపడ్డాడట. 'ఓ అబ్బాయి నన్ను ప్రేమిస్తున్నానని చెప్పాడు. 'ఓహో అలాగా' అన్నా. తర్వాత నుంచి బహుమతులు తీసుకొస్తూ వెంటపడేవాడు. కాస్త భయమేసి కొన్నాళ్లు కాలేజీకి వెళ్లలేదు' అని చెప్పారామె.
అమ్మ అలా అన్నప్పుడు షాక్..
తెరపై ఎలా ఉన్నా.. తెర వెనుక మాత్రం అనుష్క చాలా పద్ధతిగా ఉంటారు. సల్వార్‌ కమీజ్‌, చీరల్లో మాత్రమే కనిపిస్తుంటారు. అయితే డ్రెస్సింగ్‌ విషయంలో ఓ సారి తన తల్లి అన్న మాటలు షాక్‌కు గురి చేశాయని అనుష్క చెప్పారు. 'మా అమ్మ ఎప్పుడూ నేను పద్ధతిగా ఉండాలనుకుంటుంది. కానీ తను 'బిల్లా' చూసినప్పుడు 'ఇంకాస్త స్టైలిష్‌గా ఉండొచ్చు కదా. సగం మోడ్రన్‌గా, సగం పద్ధతిగా ఆ డ్రెస్సులేంటి?' అన్నప్పుడు షాకయ్యా' అని తెలిపారు.
చిన్న పిల్లలకు పాఠాలు..