కరోనా కారణంగా ఇరుక్కుపోయిన వలసకూలీలను సొంతూళ్లకు చేరవేస్తూ గొప్ప మనసు చాటుకుంటున్న బాలీవుడ్‌ నటుడు సోనూసూద్.. తాజాగా వారికి మరో సాయం చేయడానికి ముందుకొచ్చారు. ఉపాధి లేక ఇబ్బందులు పడుతున్న వారికోసం ఓ కొత్త యాప్ను ఆవిష్కరించారు. 'ప్రవాసీ రోజ్‌గార్' పేరుతో ఉచిత ఆన్లైన్ ప్లాట్‌ఫామ్‌ను విడుదల చేశారు. దేశవ్యాప్తంగా వివిధ రంగాల్లో సరైన ఉద్యోగావకాశాలు కనుగొనడం సహా వాటికి సంబంధించిన పూర్తి సమాచారంతో ఈ యాప్ కార్మికులకు సహకారం అందిస్తుంది.
నిర్మాణం, ఆరోగ్యం, ఇంజినీరింగ్, బీపీఓ, సెక్యూరిటీ, ఆటోమొబైల్, ఈ-కామర్స్, లాజిస్టిక్స్ సెక్టార్స్, ఇతర ఉద్యోగ అవకాశాల సమాచారం ఇందులో లభిస్తుంది. ఇంగ్లీష్‌ సహా ఉద్యోగ శిక్షణ నైపుణ్యాలను నేర్చుకునే అవకాశాన్ని ఇందులో అందుబాటులో ఉంచారు.