మహిళా కరాటే ఫైటర్​కు సోనూ ఆపన్నహస్తం

జాతీయ స్థాయి మహిళా కరాటే అథ్లెట్​కు శస్త్రచికిత్స చేయించి మరోసారి మంచిమనసు చాటుకున్నారు నటుడు సోనూసూద్. ఇప్పటికే లాక్​డౌన్​ ప్రభావంతో ఆయా ప్రాంతాల్లో చిక్కుకుపోయిన చాలామంది వలస కూలీలను స్వస్థలాలకు చేర్చి.. వాళ్లతో పాటు ప్రజల మనసుల్లో చోటు సంపాదించారు సోనూ.

వీరు, వారు అనే భేదం లేకుండా దేశవ్యాప్తంగా కష్టాల్లో ఉన్న పలువురిని ఆదుకుంటూ.. రియల్‌ హీరో అనిపించుకుంటున్న సోనూ సూద్‌ మరోసారి వార్తల్లో నిలిచారు. ఈసారి ఓ జాతీయ స్థాయి మహిళా కరాటే అథ్లెట్​కు.. శస్త్రచికిత్స చేయించి ఆదుకున్నారు.

జనవరి నెలలో విజేంద్ర కౌర్​ అనే మహిళా కరాటే ఫైటర్​ ప్రాక్టీసు చేస్తుండగా మోకాలు విరిగిపోయింది. మళ్లీ మాములు మనిషిగా నడిచేందుకు చాలా డబ్బులు ఖర్చవుతుందని చెప్పారు వైద్యులు. ఆర్థిక స్థోమతలేని ఈ యువతికి బంధువులు కూడా చేయూతగా నిలవలేకపోయారు. దీంతో ఆమె అప్పటినుంచి చక్రాల కుర్చీకే పరిమితమైంది. సోనూ గురించి తెలుసుకున్న ఆమె.. ట్విట్టర్​ ద్వారా సాయం చేయాలని కోరింది.

ప్లేయర్​ అభ్యర్థనకు స్పందించిన సోనూ.. తన స్నేహితుడైన ఓ వైద్యుడు చేత ఉచితంగా శస్త్రచికిత్స చేసి అండగా నిలిచారు. తనకు చేసిన సాయాన్ని ఎప్పటికీ మర్చిపోలేనని, సోనూకు జీవితకాలం రుణపడి ఉంటానని కౌర్​ భావోద్వేగానికి గురైంది.

లాక్​డౌన్​తో పలుచోట్ల చిక్కుకుపోయిన వేలమంది వలస కూలీలను తమ స్వస్థలాలకు ప్రత్యేక బస్సులు ద్వారా చేరవేశారు సోనూ.

ఇది చూడండి పవన్​-హరీశ్​ సినిమా సర్​ప్రైజ్​ వచ్చేసింది