విక్టరీ వెంకటేశ్, వరుణ్ తేజ్, తమన్నా, మెహరీన్ జంటగా దర్శకుడు అనిల్ రావిపూడి తెరకెక్కించిన కామెడీ ఎంటర్టైనర్ 'ఎఫ్ 2'. ప్రస్తుతం ఈ సినిమాకు సీక్వెల్గా 'ఎఫ్ 3' రూపొందుతోంది. సునీల్ ఇందులో కీలకపాత్ర పోషిస్తున్నాడు. తాజాగా ఈ సినిమాలో నటిస్తున్నట్లు వెల్లడించింది నటి సోనాల్ చౌహాన్. ఇలాంటి కామెడీ రోలర్ కాస్టర్ రైడ్లో తానూ భాగమవుతున్నందుకు సంతోషంగా ఉందని తెలిపింది.
'ఎనిమీ' రిలీజ్ డేట్.. 'ఎఫ్ 3'లో బాలయ్య భామ
టాలీవుడ్ సినిమాలకు సంబంధించిన అప్డేట్స్ వచ్చేశాయి. ఇందులో 'ఎఫ్ 3', 'మోస్ట్ ఎలిజిబుల్ బ్యాచ్లర్', 'ఎనిమీ' సినిమాలకు సంబంధించిన విశేషాలు ఉన్నాయి.
అప్డేట్స్
విశాల్, ఆర్య కాంబోలో తెరకెక్కిన యాక్షన్ ఎంటర్టైనర్ 'ఎనిమీ'. తాజాగా ఈ సినిమా రిలీజ్ డేట్ను ప్రకటించింది చిత్రబృందం. దీపావళి కానుకగా నవంబర్ 4న థియేటర్లలో విడుదల చేయనున్నట్లు వెల్లడించింది. ఆనంద్ శంకర్ దర్శకత్వం వహించిన ఈ చిత్రంలో మృణాళిని రవి హీరోయిన్గా కనిపించనుంది.
అఖిల్ అక్కినేని, పూజాహెగ్డే ప్రధాన పాత్రల్లో బొమ్మరిల్లు భాస్కర్ తెరకెక్కించిన 'మోస్ట్ ఎలిజిబుల్ బ్యాచ్లర్' ఇటీవలే విడుదలై బ్లాక్బస్టర్ టాక్తో దూసుకెళ్తోంది. ఈ నేపథ్యంలో సక్సెస్ పార్టీ నిర్వహించారు. ఈ పార్టీకి నిర్మాత అల్లు అరవింద్, హీరోహీరోయిన్లు అఖిల్, పూజా హెగ్డే, దర్శకుడు భాస్కర్తో పాటు పలువురు హాజరయ్యారు. దీనికి సంబంధించిన ఫొటోలు ప్రస్తుతం నెట్టింట తెగ చక్కర్లు కొడుతున్నాయి.