కరోనా బారిన పడి ఎంజీఎం ఆస్పత్రిలో చికిత్స పొందుతున్న ఎస్పీ బాలసుబ్రహ్మణ్యం త్వరగా కోలుకోవాలని ప్రముఖ గాయకుడు ఇళయరాజా ఆకాంక్షించారు. బాలుతో తనకున్న అనుబంధాన్ని గుర్తు చేసుకుని ఓ వీడియోను విడుదల చేశారు.
"బాలూ..తొందరగా కోలుకుని రా.. నీ కోసం ఎదురు చూస్తుంటాను. మనిద్దరి జీవితం కేవలం సినిమాలతోనే ముగిసిపోదు... సినిమాలతోనే మొదలైందీ కాదు. వాటికన్నా ముందు మనం సంగీత వేదికలపై చేసిన కచేరీ కార్యక్రమాలు... ఆ సంగీతం మనకు జీవితమూ, జీవితాధారమూ అయ్యాయి. ఆ వేదికలపైన మొదలైన మన స్నేహం... సంగీతమూ, స్వరమూ లాంటిది. స్వరం లేని సంగీతం ఎలా ఉండలేదో అలా నీ స్నేహం, నా స్నేహం, మన స్నేహం ఎన్నడూ దూరం కాదు. ఇద్దరి మధ్య గొడవ వచ్చినా... రాకున్నా స్నేహం స్నేహమేననీ నాకూ తెలుసూ, నీకూ తెలుసూ. కాబట్టి నువ్వు కోలుకుని లేచి రా. నువ్వు తిరిగి వస్తావని నా అంతరాత్మ చెబుతోంది. అది నిజం కావాలని దేవుణ్ణి ప్రార్థిస్తున్నాను"