'లయన్' హావభావాలతో అదరగొట్టిన షారుఖ్​

'లయన్ కింగ్' హిందీ వెర్షన్​కు డబ్బింగ్ చెపుతున్న షారుఖ్​ ఖాన్ వీడియో అభిమానుల్ని ఆకట్టుకుంటోంది. జులై 29న ప్రేక్షకుల ముందుకు రానుందీ చిత్రం.

హాలీవుడ్​ ప్రఖ్యాత నిర్మాణ సంస్థ 'డిస్నీ' మరో ప్రతిష్ఠాత్మక చిత్రంతో ప్రేక్షకుల్ని అలరించేందుకు సిద్ధమవుతోంది. 'లయన్ కింగ్​' పేరుతో తెరకెక్కుతున్న ఈ సినిమా జులై 29న ప్రపంచవ్యాప్తంగా విడుదల కానుంది.ఈ సినిమాలోని హిందీ వెర్షన్​లో ప్రధాన పాత్రలకు ప్రముఖ నటుడు షారుఖ్‌ ఖాన్, ఆయన కుమారుడు గాత్రమందించారు. ‘ముఫాసా’ పాత్రకు షారుఖ్, ‘సింబా’కు తనయుడు ఆర్యన్‌ ఖాన్‌ వాయిస్‌ అందిస్తున్నారు. ఇటీవలే షారుఖ్‌ డబ్బింగ్‌ చెప్తున్న ఓ వీడియోను చిత్ర బృందం విడుదల చేసింది. తన హావభావాలతో అందర్ని ఆకట్టుకుంటున్నాడు బాలీవుడ్​ బాద్​షా.

తెలుగు, తమిళ భాషల్లోనూ ప్రముఖ నటులు డబ్బింగ్ చెప్పనున్నారు. ‘ఐరన్‌ మ్యాన్‌’, ‘ది జంగిల్‌ బుక్‌’లతో ఆకట్టుకున్న జాన్‌ ఫేర్యూ దర్శకత్వం వహించాడు.

ఇది చదవండి: బాలీవుడ్ కింగ్​ ఖాన్​కు మరో డాక్టరేట్​