అగ్ర కథానాయకుడు విజయ్ ప్రధాన పాత్రలో నటించిన చిత్రం 'మాస్టర్'. 'ఖైదీ' ఫేమ్‌ లోకేశ్‌ కనకరాజు దర్శకత్వంలో తెరకెక్కిన ఈ చిత్రంలో.. విజయ్ సేతుపతి కీలకపాత్రలో నటించారు. అయితే లాక్డౌన్ కారణంగా 'మాస్టర్' సినిమా విడుదలలో జాప్యం జరిగింది. ఇటీవల తమిళనాడు ప్రభుత్వం ఇచ్చిన అనుమతి మేరకు ఈ సినిమా పోస్ట్‌ ప్రొడక్షన్‌ పనులను పూర్తి చేసుకుంటోంది.
మరోవైపు సామాజిక దూరం, ఇతర నిబంధనలను పాటిస్తూ జులై నుంచి థియేటర్లు పునఃప్రారంభించుకోవడానికి ప్రభుత్వం అనుమతివ్వనున్నట్టు ప్రచారం జరుగుతోంది. ఈ నేపథ్యంలో థియేటర్లు ఓపెన్‌ కాగానే మొదటి చిత్రంగా 'మాస్టర్' విడుదల చేయాలని థియేటర్‌ యజమానులు భావిస్తున్నారు. ఈ చిత్ర ప్రదర్శనతో థియేటర్లు ప్రేక్షకులతో కళకళలాడతాయని భావిస్తున్నారు.
సీనియర్ దర్శకుడు, నిర్మాతల మండలి మాజీ అధ్యక్షుడు కేయార్.. 'మాస్టర్' విడుదల గురించి రాష్ట్ర ముఖ్యమంత్రికి లేఖ రాశారు. థియేటర్లు పునఃప్రారంభమైన వెంటనే మొదటిగా 'మాస్టర్' చిత్రాన్ని ప్రదర్శించడానికి అనుమతివ్వవద్దని కోరారు. ఆ చిత్రాన్ని విడుదల చేస్తే ఎక్కువ మంది ప్రేక్షకులు థియేటర్లకు వస్తారని, దానివల్ల కరోనా మరింత వ్యాప్తి చెందే అవకాశముందని అభిప్రాయపడ్డారు. అదే జరిగితే విజయ్‌కి ఉన్న మంచిపేరు పోతుందని పేర్కొన్నారు.