'పుష్ప' రెండో సాంగ్ రిలీజ్.. అలరిస్తోన్న బన్నీ, రష్మిక కెమిస్ట్రీ

అల్లు అర్జున్ హీరోగా సుకుమార్ దర్శకత్వంలో తెరకెక్కుతోన్న చిత్రం 'పుష్ప'. దసరా కానుకగా ఈ చిత్రంలోని రెండో పాటను విడుదల చేసింది చిత్రబృందం. 'శ్రీవల్లి' అంటూ సాగే ఈ సాంగ్ అలరించేలా ఉంది.

ఐకాన్‌స్టార్‌ అల్లు అర్జున్‌ అభిమానులకు దసరా కానుక రెండురోజుల ముందే వచ్చేసింది. ఆయన కథానాయకుడిగా పుష్పరాజ్‌ పాత్రలో నటిస్తున్న 'పుష్ప' సినిమా నుంచి మరో పాటను విడుదల చేశారు. 'చూపే బంగారమాయనే శ్రీవల్లి.. మాటే మాణిక్యమాయనే' అంటూ సాగే ఈ పాటను తాజాగా చిత్రబృందం సోషల్‌మీడియాలో అభిమానులతో పంచుకుంది. తన ప్రేయసి శ్రీవల్లి(రష్మిక) చూపులకు ముగ్ధుడై.. ఆమెపై తనకున్న ప్రేమను పుష్పరాజ్‌ తెలియజేస్తున్నట్లు ఈ పాటను తీర్చిదిద్దారు. దేవిశ్రీ స్వరాలు అందించగా సిద్ధ్‌ శ్రీరామ్‌ ఈ పాటను అలపించారు. మరోవైపు ఇప్పటికే విడుదలైన 'దాక్కో దాక్కో మేక' పాట సినీ ప్రియుల్ని ఎంతగానో అలరిస్తోంది.

'ఆర్య', 'ఆర్య-2' తర్వాత బన్నీ-సుకుమార్‌ కాంబినేషన్‌లో తెరకెక్కుతోన్న హ్యాట్రిక్‌ చిత్రమిది. ఇందులో బన్నీ.. ఎర్రచందనం స్మగ్లర్‌గా ఊరమాస్‌ లుక్‌లో కనిపించనున్నారు. ఈ సినిమా కోసం మొదటిసారి రష్మిక.. బన్నీతో స్క్రీన్‌ షేర్‌ చేసుకుంటున్నారు. ఇందులో ఆమె శ్రీవల్లి పాత్రలో పుష్పరాజ్‌ ప్రేయసిగా సందడి చేయనున్నారు. మైత్రిమూవీ మేకర్స్‌ పతాకంపై ఈ సినిమా నిర్మితమవుతోంది. భారీ బడ్జెట్‌తో ఎంతో ప్రతిష్ఠాత్మకంగా తెరకెక్కుతోన్న ఈచిత్రాన్ని డిసెంబర్ 17న ప్రేక్షకుల ముందుకు తీసుకురానున్నారు. ప్రస్తుతం ఈ సినిమాలోని కీలక సన్నివేశాలను తెలుగు రాష్ట్రాల్లోని అటవీ ప్రాంతాల్లో చిత్రీకరిస్తున్నారు.