జైలు గేటు చిన్నగా ఉందని సంజన గొడవ

డ్రగ్స్​ కేసులో అరెస్టయిన నటి సంజనా గల్రానీ వేసుకున్న జామీను ఆర్జీ విచారణ నేటికి వాయిదా పడింది. దీంతో ఆమెకు వైద్య పరీక్షలు చేయించి పరప్పన అగ్రహార జైలుకు తరలించారు. వ్యాను దిగేందుకు కొంత సమయం తీసుకున్న ఆమె, నిదానంగా జైలు ప్రధాన ద్వారం వరకు వచ్చారు. అయితే లోపలికి వెళ్లడానికి కొంతసేపు మొండికేశారు.

డ్రగ్స్‌ కేసులో అరెస్టయిన నటి సంజనా గల్రానీ.. పరప్పన అగ్రహార కారాగారం లోపలకు వెళ్లేందుకు కొంతసేపు మొండికేశారు. ఆమె వేసుకున్న జామీను అర్జీ విచారణ శుక్రవారానికి వాయిదా పడడం వల్ల, ప్రత్యేక భద్రత మధ్య వైద్యశాలకు తీసుకు వెళ్లి పరీక్షలు చేయించారు. అక్కడి నుంచి నేరుగా కారాగారానికి తోడ్కొని వచ్చారు. వ్యాను దిగేందుకు కొంత సమయం తీసుకున్న ఆమె, నిదానంగా జైలు ప్రధాన ద్వారం వరకు వచ్చారు.

"ఈ గేటు చాలా చిన్నగా ఉంది. పెద్ద గేటు తెరవండి. నేను తల వంచుకుని వెళ్లను" అంటూ లోనికి వెళ్లేందుకు ఆమె మొండికేసింది. ఇలానే వెళ్లవలసి ఉంటుందని అక్కడి సిబ్బంది స్పష్టం చేయడం వల్ల చివరకు ఆమె కారాగారంలోకి వెళ్లింది. కారాగారం వెలుపల భద్రత సిబ్బంది, ఆమెను చూసేందుకు వచ్చిన స్థానికులు తమ చరవాణుల్లో ఆమె ఫొటోలు తీసుకున్నారు.

జ్యుడీషియల్‌ కస్టడీకి నటి సంజన

కర్ణాటక మాదక ద్రవ్యాల కేసులో నటి సంజనకు ఈ నెల 18 వరకు న్యాయనిర్బంధం (జ్యుడీషియల్‌ కస్టడీ) విధించారు. బుధవారం సాయంత్రం సీసీబీ పోలీసులు ఆమెను న్యాయస్థానంలో హాజరుపరచగా రెండు రోజుల కస్టడీ విధిస్తూ ఒకటో ఏసీఎంఎం న్యాయమూర్తి తీర్పు వెల్లడించారు. వెంటనే ఆమెను పరప్పన అగ్రహార జైలుకు తరలించారు.

ఇదే కేసులో నటి రాగిణి ద్వివేదికి రెండు వారాలు కస్టడీకి తరలించారు. బెయిల్‌ కోసం సంజన చేసుకున్న అర్జీని ఎన్‌డీపీఎస్‌ కోర్టుకు పంపారు. ఈ నెల 18న అక్కడే విచారణ చేయనున్నారు.