ఆరు నెలల తర్వాత కెమెరా ముందుకు సల్మాన్​

దాదాపు ఆరు నెలల తర్వాత కెమెరా ముందుకు వచ్చినందుకు సంతోషం వ్యక్తం చేశాడు బాలీవుడ్​ నటుడు సల్మాన్​ ఖాన్. తాను నటిస్తున్న కొత్త చిత్రం 'రాధే' చిత్రీకరణ ఆదివారం నుంచి పునఃప్రారంభమైందని వెల్లడించాడు.

బాలీవుడ్​ సూపర్​స్టార్​ సల్మాన్​ఖాన్​ నటిస్తోన్న కొత్త చిత్రం 'రాధే: యువర్​ మోస్ట్​ వాంటెడ్​ భాయ్​' చిత్రీకరణ ఆదివారం ప్రారంభమైంది. దాదాపు ఆరు నెలల తర్వాత షూటింగ్​లో పాల్గొన్నట్లు సోషల్​మీడియా ద్వారా వెల్లడించాడు సల్మాన్​. జాకెట్​ ధరించి, కెమెరాకు ఎదురుగా ఉన్న చిత్రాన్ని ఇన్​స్టాగ్రామ్​లో పంచుకున్నాడు.

"ఆరు నెలల తర్వాత తిరిగి షూటింగ్​లో పాల్గొనడం చాలా బాగా అనిపిస్తోంది" అని క్యాష్షన్​ ఇచ్చాడు సల్మాన్. 'రాధే: యువర్​ మోస్ట్​ వాంటెడ్​ భాయ్​' చిత్రానికి ప్రభుదేవా దర్శకత్వం వహిస్తుండగా.. దిశా పటానీ హీరోయిన్​గా నటిస్తోంది.

ఈ సినిమా మే 22న ప్రేక్షకుల ముందుకు రావల్సింది. కానీ కరోనా లాక్​డౌన్ కారణంగా వాయిదా పడింది. బుల్లితెర రియాల్టీషో బిగ్​బాస్​ 14వ సీజన్​ షూటింగ్​లోనూ సల్మాన్​ ఇటీవలే పాల్గొన్నాడు.