ఆర్​ఆర్​ఆర్​ సర్​ప్రైజ్​: ఒకే ఫ్రేములో నలుగురు స్టార్​లు

ప్రముఖ దర్శకుడు రాజమౌళి ప్రతిష్ఠాత్మకంగా తెరకెక్కిస్తున్న చిత్రం 'ఆర్‌ఆర్‌ఆర్‌'. టాలీవుడ్‌ అగ్రకథానాయకులు రామ్‌చరణ్‌, ఎన్టీఆర్‌ ప్రధాన పాత్రల్లో నటిస్తున్నారు. ఈ చిత్రంలో బాలీవుడ్‌, హలీవుడ్‌ తారలు సందడి చేయనున్నారు. తాజాగా జక్కన్నతో కలిసి చెర్రీ, తారక్​, హిందీ నటుడు అజయ్​ దేవగణ్​ కలిసి తీసుకున్న ఫొటోను అభిమానులతో పంచుకుంది చిత్రబృందం.

దర్శకధీరుడు రాజమౌళి ప్రతిష్ఠాత్మకంగా తెరకెక్కిస్తున్న 'ఆర్‌ఆర్‌ఆర్‌' చిత్రం నుంచి మరో అప్​డేట్​ వచ్చింది. ప్రస్తుతం ఈ సినిమా షూటింగ్​ శరవేగంగా జరుగుతోంది. ఇదివరకే 70 శాతం చిత్రీకరణ పూర్తయినట్లు చిత్రబృందం వెల్లడించింది. అయితే రామ్​చరణ్​, జూ.ఎన్టీఆర్​తో పాటు అజయ్​ దేవగణ్​ కలిసి ఉన్న సీన్లు ప్రస్తుతం చిత్రీకరిస్తున్నట్లు తెలుస్తోంది. తాజాగా చిత్రబృందం జక్కన్నతో ఈ ముగ్గురూ కలిసి తీసుకున్న ఫొటోను విడుదల చేసింది.

చరణ్ అల్లూరి సీతారామరాజుగా, తారక్ కొమరం భీమ్​గా కనిపించునున్నారు. వీరి సరసన ఆలియా భట్, ఒలీవియా మోరిస్ హీరోయిన్లుగా నటిస్తున్నారు. అజయ్​ దేవగణ్​ పాత్రపై ఇప్పటికీ క్లారిటీ లేదు. ఇద్దరు సూపర్​ హీరోల కలిస్తే ఎలా ఉంటుంది అనే కల్పిత కథతో ఈ సినిమాను తీస్తున్నారు. భారీ బడ్జెట్‌తో డీవీవీ దానయ్య ఈ సినిమాను నిర్మిస్తున్నాడు. కీరవాణి బాణీలు సమకూరుస్తున్నాడు. సినిమా ఈ ఏడాది జులై 30న ప్రేక్షకుల ముందుకు తీసుకొచ్చేందుకు సన్నాహాలు చేస్తున్నారు.