RRR Trailer: 'ఆర్ఆర్ఆర్' ట్రైలర్.. యూట్యూబ్లో రికార్డులు సృష్టిస్తూ దూసుకెళ్తోంది. విడుదలమైన ఐదు భాషల్లో (తెలుగు, తమిళం, కన్నడ, మలయాళం, హిందీ) భాషల్లో 15కోట్లకు పైగా వ్యూస్ సాధించింది. మార్చి 25న ప్రపంచవ్యాప్తంగా థియేటర్లలో ఈ మూవీ విడుదలకానుంది.
రూ.450 కోట్ల భారీ బడ్జెట్తో తెరకెక్కిన ఈ సినిమాలో రామ్చరణ్ అల్లూరి సీతారామరాజుగా, ఎన్టీఆర్ కొమరం భీమ్గా నటించారు. ఆలియా భట్, ఒలీవియా మోరిస్ హీరోయిన్లు. అజయ్ దేవ్గణ్, సముద్రఖని, శ్రియ తదితరులు కీలకపాత్రలు పోషించారు. కీరవాణి సంగీతమందించారు. రాజమౌళి దర్శకత్వం వహించారు. డీవీవీ దానయ్య నిర్మాత.
ఆలియా చిత్రం రిలీజ్ డేట్ ఫిక్స్..
ఆలియా భట్ హీరోయిన్గా ప్రముఖ బాలీవుడ్ దర్శకుడు సంజయ్ లీలా భన్సాలీ తెరకెక్కించిన చిత్రం 'గంగూబాయ్ కతియావాడి'. వాయిదా పడుతూ వస్తున్న ఈ చిత్రం కొత్త విడుదల తేదీని ఖరారు చేసుకుంది. ఫిబ్రవరి 25న సినిమాను రిలీజ్ చేయనున్నట్లు ప్రకటించింది చిత్రబృందం. ఫిబ్రవరి 4న చిత్ర ట్రైలర్ను విడుదల చేయనున్నారు.
కొత్త తేదీతో 'భూల్ భులయ్యా2'
కార్తిక్ ఆర్యన్, కియారా అడ్వాణీ జంటగా నటిస్తోన్న హారర్ కామెడీ చిత్రం 'భూల్ భులయ్యా 2' కొత్త విడుదల తేదీని ప్రకటించింది చిత్రబృందం. ఇదివరకు మార్చి 25 రిలీజ్ చేస్తామని ప్రకటించగా.. తాజాగా మే20న విడుదలకానున్నట్లు ప్రకటించారు మేకర్స్. ఈ చిత్రానికి అనీష్ బజ్మీ దర్శకుడు. భూషణ్ కుమార్ నిర్మాత. సీనియర్ నటి టబు కీలక పాత్ర పోషిస్తున్నారు.
బిగ్బీ చిత్రం రిలీజ్ డేట్..
అమితాబ్ బచ్చన్ ప్రధానపాత్రలో రానున్న స్పోర్ట్స్ డ్రామా చిత్రం 'ఝుండ్'. కరోనా కారణంగా పలుమార్లు వాయిదా పడిన చిత్రాన్ని మార్చి 4న విడుదల చేయనున్నట్లు ప్రకటించింది చిత్రబృందం. మరాఠి చిత్రం సైరాత్తో గుర్తింపు తెచ్చుకున్న నాగరాజ్ మంజులే ఈ సినిమాకు దర్శకత్వం వహించారు.