ఆర్​ఆర్ఆర్​.. విడుదల ఆలస్యమవుతుందా..!

జూనియర్ ఎన్టీఆర్ - రామ్​చరణ్ నటిస్తున్న ఆర్​ఆర్​ఆర్ సినిమా విడుదల వాయిదా పడే అవకాశముంది. ఇప్పటికే పలుమార్లు షూటింగ్​కు బ్రేక్ ఇచ్చిన నేపథ్యంలో వచ్చే ఏడాది దసరాకు ప్రేక్షకుల ముందుకు తీసుకొచ్చేందుకు చిత్రబృందం సన్నాహాలు చేస్తున్నట్లు సమాచారం.

బాహుబలి2 తర్వాత రాజమౌళి తెరకెక్కిస్తున్న సినిమా ఆర్​ఆర్​ఆర్​. జూనియర్ ఎన్టీఆర్, రామ్​చరణ్ కథానాయకులుగా నటిస్తున్న ఈ చిత్రం విడుదల ఆలస్యమయ్యే అవకాశం కనిపిస్తుంది. ఈ మూవీ ప్రారంభించినప్పటి నుంచి ఏదో రూపంలో ఇబ్బందులు ఎదుర్కొంటుంది చిత్ర బృందం.

ఇప్పటికే రామ్​చరణ్​, ఎన్టీఆర్ గాయపడి షూటింగ్​కు విరామం తీసుకున్న తెలిసిందే. ఇటీవల సైరా ప్రచార కార్యక్రమాల కోసం రామ్​చరణ్ మరోసారి బ్రేక్ తీసుకున్నాడు. తారక్​ కూడా వ్యక్తిగత కారణాల దృష్ట్యా షూటింగ్​కు విరామం తీసుకొవడం వల్ల సినిమా మళ్లీ ఆగినట్లు వార్తలు వినిపిస్తున్నాయి. తారక్ పక్కన హీరోయిన్​ ఎవరనేది ఇంకా ఖరారు కాలేదు.

ఈ రకంగా చూస్తుంటే వచ్చే ఏడాది జులై30న సినిమా విడుదలపై అనుమానాలు తలెత్తుతున్నాయి. అంతేకాదు.. ఒకవేళ ఈ చిత్రాన్ని వాయిదా వేయాల్సి వస్తే దసరా కానుకగా ప్రేక్షకుల ముందుకు తీసుకొచ్చేందుకు సన్నాహాలు చేస్తోందట చిత్రబృందం. ఈ అంశంపై అధికారిక ప్రకటన రావాల్సి ఉంది.

ఇదీ చదవండి: ఫొటో వైరల్​: రణ్​వీర్ ఏంటా చూపు..!