ప్రస్తుతం చిత్రీకరణలో ఉన్న భారీ బడ్జెట్ చిత్రం 'ఆర్ఆర్ఆర్'. బాహుబలి సిరీస్ తర్వాత జక్కన్న నుంచి వస్తోన్న సినిమా కావడం వల్ల దీనిపై భారీ అంచనాలే ఉన్నాయి. అంతేకాకుండా ఎన్టీఆర్, రామ్‌చరణ్‌ మల్టీస్టారర్గా నటించడం వల్ల ఈ కాంబినేషన్పై అభిమానుల్లో మరింత క్రేజ్ ఏర్పడింది. అయితే ఈ చిత్రం కోసం ఓ సరికొత్త ప్రయోగం చేస్తున్నాడట ఎన్టీఆర్.
ఈ సినిమా తెలుగు సహా తమిళ, మలయాళ, కన్నడ, హిందీ వెర్షన్లలో ఏకకాలంలో విడుదల కానుంది. అయితే ఇంత ప్రతిష్ఠాత్మక చిత్రానికి తారక్ అన్ని భాషల్లో తానే స్వయంగా డబ్బింగ్ చెప్పుకొనేందుకు సిద్ధమవుతున్నాడట. ఇప్పటికే ఈ భాషలు నేర్చుకునే పనిలో యంగ్ టైగర్ ఉన్నట్లు సమాచారం. మరి చరణ్ కూడా ఇదే తరహా ప్రయత్నం చేస్తాడేమో చూడాలి.