'కేజీఎఫ్2'లో తన పాత్ర పవర్‌ఫుల్‌గా ఉంటుందని చెప్పారు బాలీవుడ్ నటి రవీనా టాండన్. దర్శకుడు ప్రశాంత్ నీల్ కథ చెప్పిన వెంటనే ఆ సన్నివేశాలన్నీ తన ముందు కదలాడాయని తెలిపారు. ఈ సినిమాలో రమికా సేన్ పాత్రలో కనిపించనుంది రవీనా టాండన్. ఈ నేపథ్యంలో 'కేజీఎఫ్2' గురించి ఆమె పంచుకున్న ఆసక్తికర విశేషాలు మీకోసం..
యశ్‌తో తొలిసారి పనిచేయడం ఎలా అనిపించింది?
రవీనా టాండన్:మాటల్లో చెప్పలేను. యశ్ మంచి వ్యక్తి మాత్రమే కాదు, ప్రతిభావంతుడు. చక్కని నటుడు. అతనితో పనిచేసిన ప్రతి క్షణాన్ని ఆస్వాదించా.
'కేజీఎఫ్2'లో మీ పాత్ర ఎలా ఉండబోతోంది?
'కేజీఎఫ్2' లో రవీనా టాండన్ రవీనా టాండన్:ఇందులో నాది పవర్‌ఫుల్‌ పాత్ర. రమికాసేన్‌గా కనిపిస్తా. దర్శకుడు ఈ పాత్రను కాస్త వైవిధ్యంగా తీర్చిదిద్దారు. ఒక సన్నివేశంలో ప్రవర్తించినట్లు మరో సన్నివేశాల్లో ఉండదు. రమికాసేన్‌ ఎందుకలా చేస్తోందో ఎవరూ ఊహించలేరు కూడా. అంతకు మించి నేనేమీ చెప్పలేను.
అభిమానుల నుంచి ఏమైనా సందేశాలు వచ్చాయా?
రవీనా టాండన్:'కేజీఎఫ్2' కోసం సినీ అభిమానులు ఎలా ఎదురు చూస్తున్నారో.. నా అభిమానులు కూడా అలాగే చూస్తున్నారు. నేను ఈ సినిమాలో నటిస్తున్నానని చెప్పినప్పటి నుంచి ఆ ఆసక్తి ఇంకా ఎక్కువైంది. నా అభిమానుల మనస్సుల్లో నిలిచిపోయే పాత్ర అవుతుంది.
మీరు కూడా యాక్షన్‌ సన్నివేశాలు చేశారని టాక్‌ నిజమేనా?
రవీనా టాండన్:కాస్త ఆగండి.. (నవ్వుతూ)! ఇంకొన్నాళ్లు ఓపిక పడితే, స్క్రీన్‌పై చూడొచ్చు.
'కేజీఎఫ్2'లో రమికాసేన్‌ పాత్ర కోసం ప్రశాంత్ నీల్ మీ దగ్గరకు వచ్చినప్పుడు ఏమనిపించింది?
రవీనా టాండన్:ప్రశాంత్ నీల్ వచ్చి కథ చెప్పగానే నాకు చాలా ఇంట్రస్టింగ్‌గా అనిపించింది. అప్పటివరకూ నేను 'కేజీఎఫ్: చాప్టర్‌1 చూడలేదు. చూసిన తర్వాత ఇంత అద్భుతంగా ఎలా తీశారా? అనిపించింది. ఆయన కథ చెప్పిన తీరు, చాప్టర్‌2లో నా పాత్ర అన్నీ వరుసగా కళ్ల ముందు కదిలాయి. ఈ సినిమాకు నో చెప్పడానికి నాకు ఒక్క కారణం కూడా కనిపించలేదు. మరో ఆలోచన లేకుండా ఓకే చెప్పేశాను.
ప్రశాంత్ నీల్, హోంబలే ఫిల్మ్స్ తో పనిచేయడం మీకెలా అనిపించింది?
రవీనా టాండన్:ప్రశాంత్ పనిచేసే తీరు చాలా పవర్‌ఫుల్‌గా ఉంటుంది. పైకి నెమ్మదస్తుడిగా కనిపించినా, ఆయనలో ఆలోచనల ప్రవాహం సాగుతూ ఉంటుంది. సినిమాకు సంబంధించి ఆయన కనే కలలు, ఆలోచనలు.. సామాన్యులకు కూడా అందవు.
యశ్ కథానాయకుడిగా తెరకెక్కుతున్న భారీ బడ్జెట్‌ చిత్రం 'కేజీఎఫ్2'. ఈ సీక్వెల్లో సంజయ్‌ దత్‌, రవీనా టాండన్, ప్రకాశ్‌రాజ్‌, రావురమేశ్‌లు కీలక పాత్రలు పోషిస్తున్నారు.
ఇదీ చూడండి:జ్వాల కన్న జ్వాలాపుత్రుడు.. ఈ రాకీభాయ్!
