సెలబ్రిటీలు సామాజిక మాధ్యమాల్లో ఖాతాలు తెరవడం ఇటీవల కాలంలో పెద్ద చర్చనీయాంశంగా మారుతున్నాయి. మొదటి పోస్ట్ ఏం చేస్తారోనని అభిమానులకు ఆతృతగా ఎదురుచూస్తున్నారు. మెగా పవర్‌స్టార్‌ రామ్చరణ్ విషయంలోనూ ఇదే జరిగింది. ఇటీవలే తన ఇన్స్టాగ్రామ్ ఖాతా తెరవగా... తొలి పోస్ట్ గురించి ఆసక్తిగా వేచిచూశారు మెగాఫ్యాన్స్. శుక్రవారం మొదటి సందేశాన్ని షేర్ చేసిన చెర్రీ... తన తల్లితో కలిసి చిన్నప్పుడు దిగిన ఫొటోనూ, ఇటీవల దిగిన ఫొటోను కలిపి నెటిజన్లతో పంచుకున్నాడు.
" కొన్ని విషయాలు ఎప్పటికీ మారవు. నా తొలి పోస్ట్ నీకే అంకితం చేస్తున్నా. లవ్యూ అమ్మా"
--రామ్చరణ్, సినీ నటుడు
ఫొటో పెట్టిన కొద్దిసేపటికే 50వేలకుపైగా లైక్‌లు వచ్చాయి. ‘చరణ్ అన్నా.. చిన్నప్పుడు చాలా ముద్దుగా ఉన్నావ్‌’ అంటూ అభిమానులు కామెంట్లు పెడుతున్నారు. చెర్రీ ఇన్స్టాగ్రామ్ ఖాతా తెరిచిన కొంత సమయంలో వెరిఫైడ్‌ మార్క్‌ వచ్చేసింది. ప్రస్తుతం ఆయన ఖాతాను నాలుగు లక్షల మందికిపైగా ఫాలో అవుతున్నారు.
టాలీవుడ్ హీరో ప్రభాస్ ఇన్స్టా ఖాతా తెరిచిన సమయంలో ఫ్యాన్స్ ఇలానే ఎదురుచూశారు. తన తొలి పోస్ట్లో బాహుబలి సినిమాలో ఫొటోను పంచుకున్నాడు రెబల్ స్టార్.
దర్శకధీరుడు ఎస్.ఎస్ రాజమౌళి దర్శకత్వంలో రామ్ చరణ్ 'ఆర్.ఆర్.ఆర్' సినిమా చిత్రీకరణతో బిజీగా ఉన్నాడు. ఇటీవల భారీ యాక్షన్‌ ఘట్టాలను తెరకెక్కించారు. వారం రోజుల విశ్రాంతి తర్వాత ఇటీవలే మళ్లీ షూటింగ్ ప్రారంభమైంది. ఇందులో చెర్రీ అల్లూరి సీతారామరాజు పాత్రలో, ఎన్టీఆర్‌ కొమరం భీమ్‌ పాత్రల్లో నటిస్తున్నారు. 2020 జులై 30న సినిమా ప్రేక్షకుల ముందుకు రానుంది.
