తమిళ దర్శకుడితో రామ్​.. 'శ్రీకారం' ప్రోమో సాంగ్​ రిలీజ్​

కొత్త సినిమా కబుర్లు మీ ముందుకొచ్చేశాయి. హీరో రామ్​ కొత్త సినిమా సహా పలు చిత్ర విశేషాలు ఉన్నాయి. అవేంటో చూసేద్దాం.

యువ కథానాయకుడు రామ్‌ కొత్త చిత్రం ఖరారైంది. లింగుస్వామి దర్శకత్వంలో ఆయన సినిమా చేసేందుకు పచ్చజెండా ఊపేశారు. తమిళ దర్శకుడైన లింగుస్వామి 'పందెం కోడి', 'రన్‌', 'ఆవారా' తదితర అనువాద చిత్రాలతో తెలుగు ప్రేక్షకుల్ని అలరించారు.

విశాల్​ నటించిన కొత్త సినిమా 'చక్ర' ప్రపంచవ్యాప్తంగా ఫిబ్రవరి 19న విడుదల కానుంది. ఈ నేపథ్యంలో తన సినిమాను ప్రతిఒక్కరూ థియేటర్​కు వెళ్లి కరోనా జాగ్రత్తలు పాటిస్తూ సినిమా చూడాలని కోరారు.

'రంగస్థలం' ఫేం మహేష్, రాకేందు మౌళి, 'కంచరపాలెం' రాజు ప్రధాన పాత్రల్లో నటించిన 'హాఫ్​స్టోరీస్'​ సినిమాకు సంబంధించిన మోషన్​ పోస్టర్​ను దర్శకుడు మారుతి ఫిబ్రవరి 19న విడుదల చేయనున్నారు. ఈ చిత్రాన్ని బేబీ లాలిత్య సమర్పణలో శ్రీ వెన్నెల క్రియేషన్స్ పతాకంపై శివవరప్రసాద్ కె. దర్శకత్వంలో యం. సుధాకర్ రెడ్డి నిర్మిస్తున్నారు.

తాను నటించిన 'కపటధారి' సినిమా ప్రతిఒక్కరూ తప్పకుండా చూడాలని విజ్ఞప్తి చేశారు హీరో సుమంత్​. ఫిబ్రవరి 19న విడుదల కానుందీ చిత్రం.

శ్రీకాంత్​, లక్ష్మీరాయ్​ నటించిన 'మిరుగ' సినిమా తమిళ థియేట్రికల్​ హక్కులను సుష్మ సినీ ఆర్ట్స్​ సొంతం చేసుకుంది. ఈ సినిమాను మార్చిలో భారీ ఎత్తున విడుదల చేసేందుకు సన్నాహాలు చేస్తున్నారు.

'శ్రీకారం' సినిమాలోని 'హే అబ్బాయ్​' పూర్తి పాటను ఫిబ్రవరి 19న విడుదల చేయనున్నారు. నేడు దీనికి సంబంధించిన ప్రోమోను విడుదల చేశారు. శర్వానంద్​, ప్రియంకా మోహన్​ జంటగా నటించిన ఈ చిత్రాన్ని బి.కిశోర్‌ తెరకెక్కించారు. మహాశివరాత్రి కానుకగా మార్చి 11న ప్రేక్షకుల ముందుకు రానుందీ సినిమా.

'ఉప్పెన' సినిమా విజయం సాధించిన నేపథ్యంలో చిత్రబృందం అన్నవరం సత్యనారాయణ స్వామి దేవాలయాన్ని సందర్శించింది. వైష్ణవ్​తేజ్​, కృతిశెట్టి, దర్శకుడు బుచ్చిబాబు సహ పలువురు ఆలయాన్ని సందర్శించారు.

తన తల్లి జన్మదినం సందర్భంగా పుట్టినరోజు శుభాకాంక్షలు తెలిపారు హీరో రామ్​చరణ్​. సామాజిక మాధ్యమాల వేదికగా తన ప్రేమను చాటుకున్నారు.