ఈసారి సంక్రాంతికి సినిమాల సందడి మాములుగా ఉండదు. బాక్సాఫీసు దద్దరిల్లిపోవడం ఖాయం. ఎందుకంటే అగ్రహీరోలు పవన్కల్యాణ్, మహేశ్బాబు, ప్రభాస్ తమ సినిమాలతో ప్రేక్షకుల అలరించేందుకు సిద్ధమయ్యారు.
సంక్రాంతికి స్టార్స్ హంగామా
మహేశ్ 'సర్కారు వారి పాట', పవన్-రానా 'అయ్యప్పనుమ్ కోశియమ్' రీమేక్ ఇప్పటికే 2022 సంక్రాంతి బరిలో ఉన్నట్లు ప్రకటించారు. ప్రభాస్ 'రాధేశ్యామ్' కూడా పండగకే రానుందని చిత్రబృందం అధికారికంగా ప్రకటించింది. సూట్ వేసుకుని సూట్కేసు పట్టుకుని ఉన్న ప్రభాస్ కొత్త పోస్టర్ను శుక్రవారం విడుదల చేసింది.
టైమ్ ట్రావెల్ కథతో?
'రాధేశ్యామ్' కొత్త పోస్టర్ చూస్తుంటే ఆసక్తికరంగా కనిపిస్తోంది. టైమ్ ట్రావెల్ కథతో ఈ సినిమా తెరకెక్కించినట్లు తెలుస్తోంది. 1970ల నాటి యూరప్ సెట్లు ఉండటం దీనికి బలం చేకూరుస్తోంది. మరి ఎలాంటి కథతో ఈ చిత్రాన్ని తీశారో తెలియాలంటే సంక్రాంతి వరకు ఆగాల్సిందే.